Te arue ra te hoê tamaiti iti ia Iehova
MAI te peu e e hinaaro mau ratou e tavini ia Iehova, e rave rahi ïa mau ravea e nehenehe ai te mau tamarii e arue ia Iehova. O ta te ohipa hoi i farereihia e te hoê tamaiti iti e pae matahiti i te fenua Kenya tooa o te râ, e faaite mai. — Koheleta 12:1.
Ua ani atura to ˈna metua vahine ia ˈna e: “Eaha ta oe ohipa e rave ia paari oe?” I roto i te amuiraa, ua ite taua tamaiti iti nei i te hoê pionie taa ê, e ua pahono atura ïa oia e: “E hinaaro vau e riro atu ei pionie taa ê mai ia taeae F——.” Ua na ô maira râ to ˈna metua vahine e: “Eita ta oe e nehenehe. Nafea hoi oe e nehenehe ai e riro mai ei pionie tamau noa inaha, aita hoi ta oe e haapiiraa bibilia?” I te uiraa ra e: “Eaha ïa ta ˈu e nehenehe e rave?”, ua pahono maira te metua vahine i ta ˈna tamaiti iti ra e ia faaitoito oia i te faaite i te parau mau i to ˈna mau hoa haapiiraa e ta ˈna buka Ta ˈu Buka Aamu Bibilia.
Ma te rave na muri ia ˈna ta ˈna buka Aamu, ua haere atura taua tamaiti iti nei e farerei i to ˈna mau hoa e ua titau atura ia ratou ia haapii i te Bibilia e o ˈna. Eaha ïa te ohipa i iteahia mai e ana?
Ua haaputuputu aˈera oia i te hoê pǔpǔ hoê ahuru tamarii ta ˈna e nehenehe e aratai i te haapiiraa bibilia. Ua faaohipa aˈera o ˈna ma te aravihi i te mau hohoˈa, ua vauvau atura hoi e rave rahi mau uiraa no te faahohonu i te tumu parau e tuatapapahia ra e ua ui atura i te mau uiraa ei faahaamanaˈo-faahou-raa, ia hope te haapiiraa. Mai te peu e eita e mau mai i to ˈna mau hoa te tahi tumu parau, e na nia iho faahou â ïa o ˈna. Ia au i te mau parau a to ˈna mama, mea oaoa mau ia ite pauroa taua mau tamarii ra ia parahirahi noa mai na mua i te fare e ia haapii amui, e ta ˈna tamaiti e pae matahiti te ui atura i te mau uiraa e ia ite i te tahi pae ia afai te rima i nia no te pahono.
Auê ïa oaoa taa ê mau no te metua vahine, e no te amuiraa taatoa e, ia ite atu i taua na tamarii e vau ra ia haere mai i te mau putuputuraa! Mea apî roâ te tahi na tamarii toopiti no te haere mai. E inaha, ua itehia te reira, no te mea noa ua hinaaro te hoê tamaiti iti e pae matahiti e arue ia Iehova e e tauturu i to ˈna mau taata-tupu.