Iesu, to ˈna oraraa e ta ˈna taviniraa

Te haapii ra Iesu na roto i te mau faahohoˈaraa

MAI te huru ra ïa e tei Kaperenaumi o Iesu, a aˈo uˈana ai oia i te mau Pharisea. I muri aˈe, i roto noâ i taua mahana ra, faarue aˈera oia i te fare ta ˈna e noho ra e haere avae noa ˈtura i te miti no Galilea, aita hoi i atea roa. I reira, haaputuputu maira e rave rahi taata. Paiuma atura o Iesu i nia iho i te hoê poti, faaatea ê atura i te hiti e haapii maira i te feia o tei haaputuputu mai i te hiti miti; haapii ihora oia ia ratou no nia i te Basileia o te raˈi ma te faaohipa i te tahi mau parabole, aore ra faahohoˈaraa, tei matau-maitai-hia e ratou.

Na mua roa, te parau ra Iesu no te hoê taata tei ueue i te huero. Mairi atura te tahi huero i te pae aratia e ua pau i te mau manu. Mairi atura te tahi pae i te vahi pǎpǎ. I te mea e to nia roa te mau aa, mǎrô atura te mau ohi i raro aˈe i te mahana veavea. E mairi â vetahi i roto i te mau aihere, o tei faaapǐapǐ i te mau ohi ia tupu. E inaha, mairi aˈera vetahi mau huero i nia i te repo maitai e tupu atura i te hotu, vetahi hanere, vetahi taiono ahuru e vetahi taitoru ahuru i te hoê.

I roto i te piti o te faahohoˈaraa, te haapapu ra o Iesu e e au te Basileia o te Atua i te hoê taata i ueue i te huero. A mairi noa ˈi te mau mahana, a taoto ai te taata aore ra ua ara oia, te tupu ra te huero. E aita taua taata i ite e mea nafea. E tupu noa te huero e e faahotu i te maa. A paari ai te huero, e ooti te taata i te reira.

Te parau nei Iesu i te toru o te faahohoˈaraa no nia i te hoê taata e ueue ra i te huero maitai. A taoto ai oia, haere maira to ˈna enemi e ueue ihora i te zizania i roto i te sitona. Ani atura te mau tavini o taua taata ra mai te peu e e tia ia ratou ia huti i te zizania. Pahono atura oia e: “Eiaha; oi pee atoa te sitona ia vaere outou i te zizania. E vaiiho noa ia tupu apipiti noa na e ia auhene; e ia tae i te tau auhune ra, na ˈu e parau atu i te feia ooti, E mata na i te rave i te zizania e ruuruu no te auahi, e hopoi râ i te sitona i roto i tau fare vairaa ra.”

I roto noâ i ta ˈna oreroraa parau tei faataehia i te feia rahi roa i te hiti pape, ua faataa aˈera o Iesu e piti â faahohoˈaraa. Te haapapu maira oia e e au ‘te Basileia o te ao ra’ i te hoê huero sinapi ta te hoê taata i ueue. Noa ˈtu â e e huero nainai roa i roto i te mau huero atoa, ta ˈna e parau ra, e riro mai te huero sinapi, ia tupu anaˈe, te tumu raau rahi roa ˈˈe i roto i te mau tumu pota atoa. E riro mai oia ei tumu raau e e haere mai te mau manu i roto i te mau amaa e faafaaea.

Te parau nei vetahi pae i teie mahana e te vai ra te mau huero nainai roa ˈˈe i te huero sinapi. Aita o Iesu e horoa maira i te hoê haapiiraa no nia i te faaapu. Ua riro mau iho â te huero sinapi ei huero nainai roa ˈˈe ta te mau taata no Galilea i ite i taua tau ra. Te taa ra ïa ia ratou e te parau ra o Iesu no nia i te hoê tupuraa rahi.

I te pae hopea, te faaau ra o Iesu “i te Basileia o te ao ra” i te faahopue i anoihia e te hoê vahine i roto i na farii faraoa e toru ra. I roto i te roaraa o te tau, ta ˈna ïa e haapapu ra, e faahopue roa te faraoa i anoihia.

I muri aˈe to ˈna faahitiraa i taua na faahohoˈaraa e pae, ua vaiiho o Iesu i te feia rahi roa e ua haere i roto i te fare i reira oia e noho ai. E ua haere atoa mai ta ˈna mau aposetolo e 12 e vetahi mau pǐpǐ ia ˈna ra. Mataio 13:1-9, 24-36; Mareko 4:1-9, 26-32; Luka 8:1-8.

◆ Afea e i hea roa to Iesu parauraa ˈtu i te feia rahi roa e te mau faahohoˈaraa?

◆ Eaha te faahohoˈaraa e pae ta Iesu i parau atu i te feia rahi roa?

◆ No te aha o Iesu i parau atu ai e o te huero sinapi te huero nainai roa ˈˈe i roto i te mau huero atoa?