Iesu, to ˈna oraraa e ta ˈna taviniraa

Eaha te nehenehe e rave i te mahana sabati?

I TE TAHI atu mahana sabati, ua tomo atura Iesu i roto i te hoê sunago i pihai noa ˈtu i te miti no Galilea. I reira, te vai ra ïa te hoê taata tei marô roa te rima. Te tamoemoe ra te mau papai parau e te mau Pharisea ia Iesu, no te hiˈo e e faaora anei oia i taua taata nei. E inaha, ua ani atura ratou ia ˈna i te na ôraa atu e: “E au anei i te ture ia faaora i te sabati?”

Te manaˈo ra hoi te mau upoo faatere haapaoraa ati iuda e e tiamâraa to ratou no te faaora i te hoê taata maˈi i te mahana sabati mai te peu noa e te fifi ra to ˈna ora. Ei hiˈoraa, e haapii na ratou e, i te mahana sabati, e opanihia ia rapaau i te hoê ivi tei maoˈi. Mai te peu e e uiui atu te mau papai parau e te mau Pharisea ia Iesu, te tumu ra, ia nehenehe ïa ratou e pari atu ia ˈna.

Teie râ, ua ite Iesu eaha to ratou feruriraa. Te taa atoa ra hoi ia ˈna e te faarahi ra ratou i to ratou manaˈo, e aita e tano ra i te mau Papai, no nia i te mea e riro ei orure i te ture e opani ra e ia ravehia i te hoê noa ˈˈe ohipa i te mahana sabati. No reira ˈtura Iesu i tuu mai ai i te hoê manaˈo patoi i rotopu ia ˈna e taua mau upoo faatere haapaoraa ra i te faaueraa ˈtu i te taata tei marô hoi te rima e: “A tia mai oe i ropu nei.”

Ua fariu tia ˈtura Iesu i nia i te mau papai parau e te mau Pharisea e ua na ô atura ia ratou e: “O vai ia taata i roto ia outou na, hoê ana mamoe e ia mairi i roto i te apoo i te sabati, e ore e rave atu, e ume mai i nia?” I te mea hoi e e nehenehe ratou e hoonahia i te hoê mamoe, aita ˈtura ïa ratou e vaiiho atu ia ˈna i roto i te apoo e poipoi aˈe, no te mea e nehenehe o ˈna e ino e e topa roa mai ïa to ˈna moni hoo. Hau atu â, te na ô ra te mau Papai e: “E haapao â te taata parau-tia ra i ta ˈna puaa ia ora.”

Ei faatuatiraa i taua parau nei, te na ô râ Iesu e: “E ere anei e maitai rahi to te taata i to te mamoe? E au maori te ture ia hamani maitai i te sabati.” Ma te ore hoi e nehenehe e pahono atu i taua huru feruriraa tano mau ra e tei î atoa i te here, ua mamû noa ˈtura te mau upoo faatere haapaoraa.

No to ˈna hoi peapea no to ratou huru maamaa, ua hiˈo noa ˈtura Iesu ia ratou. Ua na ô maira râ oia i te taata maˈi e: “A titoo mai na i to rima.” Ua titoo maira oia, e ua ora aˈera hoi to ˈna rima.

Maoti hoi i te oaoa no taua faaoraraa i ravehia ra, ua haere ê atura te mau Pharisea, tei hinaaro e taparahi ia Iesu, e ua opua aˈera ratou e apiti atu i te mau taata a Heroda no te hoê opuaraa ino. Ua faatupu aˈera ratou i te hoê pupu politita e mai te huru ra ïa e e mau Sadukea atoa to roto. Mai tei matauhia, e faaite tahaa mai na te feia e turu na ia Heroda e te patoi ra ratou i te mau Pharisea, i teie nei râ, te tahoê maite ra ratou no te patoi atu ia Iesu. Mataio 12:9-14; Mareko 3:1-6; Luka 6:6-11; Maseli 12:10; Exodo 20:8-10.

◆ Eaha te mea i tupu ai te hoê aroraa i rotopu ia Iesu e te mau upoo faatere haapaoraa ati iuda?

◆ Eaha te manaˈo o te mau ati Iuda i te mau faaoraraa maˈi e ravehia i te mahana sabati?

◆ Eaha te hohoˈa ta Iesu i faaohipa no te patoi atu i to ratou manaˈo hape?