Te hoê rata a te Tino aratai

E te mau taeae e tuahine e:

I roto i ta ˈna poroi i te amuiraa no Semurina, ua parau Iesu: “Eiaha oe e mǎtaˈu i ta oe e fatata i te faaruru.” (Apo. 2:10) No tatou atoa ta ˈna faaitoitoraa e eiaha e mǎtaˈu, tatou o te ora nei i “te mahana o te Fatu ra.” (Apo. 1:10) Ua tano iho â te reira ‘e tau ino mau e te fifi ia faaruru,’ e mea putapû roa ia ite i to te Atua nunaa na te ao nei, ia tapea i to ratou faaroo e itoito no te vai taiva ore ia Iehova!—Tim. 2, 3:1-5.

E nafea tatou paatoa ia vai taiva ore e ia itoito noa? (Heb. 10:39) E ere i te mea ohie, te faaruru ra paha tatou i te patoiraa e oia atoa te hamani-ino-raa. E nehenehe noa râ tatou e faaoti ma te itoito, e turu ia Iehova e e rave i ta ˈna e parau, noa ˈtu mea mamahu anei aore ra e taiâ tatou. Eaha te tauturu mai?

E nehenehe te Bibilia e tauturu ia outou ia faatupu i te itoito. Mea rahi te hiˈoraa o te mau tane e vahine itoito i roto i te Bibilia. Ua faaineinehia teie buka no te tauturu mai ia hiˈopoa i ta ratou i rave e ia feruri i nia i to ratou hiˈoraa. Ia taio outou i to ratou aamu, a pure ia Iehova no te tauturu mai ia ite e nafea to ratou hiˈoraa e tauturu ai ia outou o te faaruru nei i te fifi oia atoa i roto i to outou oraraa aore ra no a muri aˈe. A feruri e nafea Iehova ia tauturu ia outou ia faatupu i te itoito. A feruri atoa, e nafea te itoito ta teie mau tane e vahine i faaite e faaitoito ai ia outou i roto i teie mau tupuraa i muri nei:

Ia rave i te mau faatanoraa. (Iak. 3:17) I to Iehova patoiraa ia Saula e maitiraa ia Davida no te riro mai ei arii, ua faaite Ionatana i te taiva ore e te itoito, ma te turu ma te aau atoa i te faaotiraa a Iehova.

Ia paturu i te mau faaueraa tia. (Heb. 11:32-34) Ua ineine Hanania, Misaela, e Azaria i te pohe i roto i te hoê umu auahi, i te haafifi i to ratou faaroo ma te tuturi i mua i te hoê idolo.

Ia faaite i te parau mau no nia ia Iehova e Iesu. (Mat. 22:16) A feruri na ia Saulo no Tareso, o tei faaite i te parau mau no nia ia Iesu i te feia tei manaˈo e tauturu oia ia ratou ia hamani ino i te mau pǐpǐ a Iesu.

Te pure nei matou e tauturu teie buka ia outou ia faatupu i te faaroo e te itoito. (Sal. 27:14) Ia haamaitai Iehova ia outou ia tauturu i to outou utuafare e to roto i te amuiraa ia faatupu i te itoito no te turu i te Faatereraa arii a te Atua!