HAAPIIRAA 43
Eaha te manaˈo tano o te mau Kerisetiano no nia i te ava?
Ati aˈe te ao nei, ua rau te manaˈo o te taata no nia i te ava. Mea au na te tahi i te inuinu e te mau hoa. E maiti vetahi e haapae i te ava area vetahi atu e inu ratou a taero atu ai. Eaha te manaˈo o te Bibilia i nia i te ava?
1. Mea ino anei ia inu i te mau ava?
Aita te Bibilia e parau ra mea ino ia inu i te ava. Ia faahitihia te mau ô e rave rahi ta te Atua i horoa mai, te faahiti atoa ra te Bibilia i “te uaina o te faaoaoa i te aau o te taata.” (Salamo 104:14, 15) Ua faahitihia i roto i te Bibilia te tahi mau tavini tane e vahine taiva ore tei inu i te mau ava.—Timoteo 1, 5:23.
2. Eaha te aˈoraa ta te Bibilia e horoa ra no tei maiti i te inu?
E opani Iehova i te inu-hua-raa e te taero ava. (Galatia 5:21) Te na ô ra ta ˈna Parau: “Eiaha oe e tia i rotopu i te feia e inu rahi roa i te uaina.” (Maseli 23:20) Ia maiti tatou i te inu, noa ˈtu o tatou noa, eiaha tatou ia inu rahi roa e haafifi te reira i to tatou feruriraa, eita tatou e haavî i to tatou vaha e ta tatou mau ohipa aore ra e faaino te reira i to tatou ea. Mai te peu eita tatou e haavî i ta tatou inuraa, mea titauhia ia faaea roa i te inu.
3. E nafea tatou e faatura ˈi i te mau faaotiraa a vetahi no nia i te ava?
Na te taata tataitahi e faaoti e inu i te mau ava. Eiaha tatou e haava i te hoê taata tei maiti i te inu i te ava ma te tano e eiaha tatou e faahepo i te hoê taata mai te peu eita oia e hinaaro e inu. (Roma 14:10) E maiti tatou eiaha e inu mai te peu e haafifi te reira ia vetahi ê. (A taio i te Roma 14:21.) E imi tatou “eiaha i to [tatou] iho maitai, i to vetahi ê râ.”—A taio i te Korinetia 1, 10:23, 24.
A FAAHOHONU ATU Â
A hiˈo i te mau faaueraa tumu Bibilia o te tauturu ia oe ia faaoti e inu e eaha te faito ta oe e inu. A hiˈo atoa eaha ta oe e nehenehe e rave mai te peu e fifi to oe i te ava.
4. A faaoti e inu anei oe
Eaha to Iesu manaˈo no nia i te inuraa i te ava? No te ite i te pahonoraa, a hiˈo te semeio matamua ta ˈna i faatupu. A taio i te Ioane 2:1-11, e a aparau i teie mau uiraa:
I roto i teie semeio, eaha ta tatou e haapii mai i to Iesu manaˈo no nia i te ava e tei inu i te ava?
I te mea e aita Iesu i opani e inu i te ava, eaha ïa to te Kerisetiano manaˈo no tei maiti e inu?
Tera râ, no te mea noa e tiamâraa to te hoê Kerisetiano e inu i te ava, e ere ïa te auraa e mea paari ia na reira noa. A taio i te Maseli 22:3, e a hiˈo e nafea teie mau tupuraa e nehenehe ai e ohipa i nia i ta oe faaotiraa e inu:
Ia faahoro oe aore ra ia faaohipa oe i te mau matini.
Ia hapû oe.
Ia parau te hoê taote ia oe eiaha e inu i te ava.
Mea fifi no oe ia faatano i ta oe inuraa ava.
Aita te ture e vaiiho ia oe ia inu i te ava.
Te pihai iho oe i te hoê taata tei faaoti e haapae i te ava no te mea ua haafifi te reira ia ˈna i na mua ˈˈe.
E tuu anei oe i te ava i te hoê oroa faaipoiporaa aore ra i te tahi atu tamaaraa? No te ite eaha te tauturu ia oe ia rave i te hoê faaotiraa, a pata i te VIDEO.
A taio i te Roma 13:13 e te Korinetia 1, 10:31, 32. Ia oti te mau irava i te taiohia, a aparau i teie uiraa:
Nafea te faaohiparaa o teie faaueraa tumu e tauturu ai ia oe ia rave i te hoê faaotiraa o ta Iehova e au?
Na te Kerisetiano tataitahi e faaoti no ˈna iho e inu anei i te ava aore ra eita. Noa ˈtu e inu oia i te tahi taime, e nehenehe oia e faaoti i te tahi atu taime eiaha e inu
5. A faaoti ehia rahiraa ava ta oe e inu
Ia faaoti oe e inu i te ava, a haamanaˈo i te reira: Noa ˈtu aita Iehova e opani ia inu i te ava, te parau ra oia e mea ino ia inu hua. No te aha? A taio i te Hosea 4:11, 18, e a aparau i teie uiraa:
Eaha te tupu ia inu rahi roa te hoê taata?
Nafea tatou e nehenehe ai e patoi i te inu-hua-raa? E titauhia ia tatou ia faaite i te aau haehaa aore ra ia ite i to tatou mau otia. A taio i te Maseli 11:2, e a aparau i teie uiraa:
No te aha e manaˈo maitai ia tuu i te hoê otia papu i ta oe inuraa?
6. A haavî i te inu-hua-raa
A hiˈo eaha tei tauturu i te hoê taata ia faaea i te inu-hua-raa i te ava. A pata i te VIDEO, e a aparau i te mau uiraa i muri nei.
I roto i te video, nafea te ava i te ohiparaa i nia i te huru o Dmitry?
Ua faaea oioi anei oia i te inu?
E nafea oia i te faaore-roa-raa i te inu-hua-raa i te ava?
A taio i te Korinetia 1, 6:10, 11, e a aparau i teie mau uiraa:
No te aha e fifi mau te inu-hua-raa i te ava?
Eaha te faaite mai e nehenehe te hoê taata tei inu-hua i te ava e taui?
A taio i te Mataio 5:30, e a aparau i teie uiraa:
A faaohipa ˈi Iesu i te faahohoˈaraa o te rima tâpû-ê-hia, ua hinaaro oia e parau e titauhia paha ia tatou ia vaiiho i te tahi mea no te faaoaoa ia Iehova. Eaha ta oe e nehenehe e rave ia haafifi te inu-hua-raa i te ava ia oe?a
A taio i te Korinetia 1, 15:33, e a aparau i teie uiraa:
E nafea to oe mau hoa e nehenehe ai e ohipa i nia i ta oe inuraa ava?
E ANI PAHA VETAHI: “Mea ino anei ia inu?”
Nafea oe e pahono ai?
HAAPOTORAA
Ua horoa mai Iehova i te ava no te faaoaoa ia tatou, ua opani râ oia i te inu-hua-raa e te taero ava.
Haamanaˈoraa
Eaha te manaˈo o te Bibilia no nia i te ava?
Eaha te mau fifi o te inu-hua-raa?
E nafea tatou e faatura ˈi i te mau faaotiraa a vetahi no nia i te inuraa i te ava?
HIˈOPOA
Nafea te mau taurearea e nehenehe ai e rave i te mau faaotiraa tano no nia i te ava?
A hiˈo i te mau taahiraa ta oe e nehenehe e rave no te haavî i te inuraa.
“Ia tano noa te manaˈo i te ava” (Te Pare Tiairaa 1 no Fepuare 2010)
Afea e nafea e titauhia ˈi i te mau metua ia paraparau i ta ratou tamarii no nia i te inuraa i te ava?
“Ia paraparau i te tamarii no nia i te ava” (Tumu parau natirara)
I roto i te aamu “Mai te hoê paero puta ra vau,” a hiˈo nafea te hoê taata i te faaearaa i te inu hua i te ava.
“Ua taui te Bibilia i to ˈu oraraa” (Tumu parau o Te Pare Tiairaa)
a E titauhia paha te tauturu a te hoê taote no te feia tei matau i te inu i te ava ia tiamâ mai ratou. E rave rahi taote te parau i te feia e fifi to ratou i te ava eiaha roa ˈtu ratou e inu faahou.