E nafea oe e faufaahia ˈi i te Bibilia?

Ua haamata paha oe i te hoê opuaraa rahi i manaˈo ai oe eita e maraa ia oe ia rave. Eaha ïa ta oe e rave? E tatuhaa oe i ta oe ohipa. Hoê â huru no te taioraa Bibilia. E ui paha oe: ‘Nahea vau ia haamata?’ I roto i teie haapiiraa oe e ite ai eaha ta oe e nehenehe e rave ia au atu â oe i ta oe taioraa e haapiiraa i te Bibilia.

1. No te aha e taio tamau ai tatou i te Bibilia?

E oaoa e e manuïa te taata e tamau ra i te taio i te Bibilia aore ra i “te ture a Iehova.” (A taio i te Salamo 1:1-3.) A haamata na i te taio tau minuti i te mau mahana atoa. E rahi atu â oe i te haamatau e te Parau a te Atua, au noa ˈtu â oe i ta oe taioraa Bibilia.

2. Eaha ta oe e rave no te haafaufaa i ta oe taioraa Bibilia?

Ia faaea ïa maa taime iti e ia feruri eaha ta oe i taio mai nei. Te auraa, e taio oe e e “feruriruri” oe i te reira. (Iosua 1:8, nota i raro i te api) A uiui ia oe iho: ‘Eaha ta teie taioraa e haapii mai ra no nia i te Atua ra o Iehova? Nafea vau e faaohipa ˈi i te reira i roto i to ˈu oraraa? E nafea vau e faaohipa ˈi i teie mau irava no te tauturu ia vetahi ê?’

3. Eaha te taime tano no oe no te taio i te Bibilia?

E manaˈo paha oe, eita e haere ia oe. Ua tamata e rave rahi i “te faaohipa maitai” i to ratou taime, e ua naea ia ratou tera fa. (Ephesia 5:16) A faataa ïa i te hoê taime no oe no te taio i te Bibilia i te mau mahana atoa. Te taio nei vetahi i ta ratou Bibilia i te poipoi, ta te tahi i te hora tamaaraa aore ra i te tahi atu taime o te mahana e te tahi atu hou a taoto ai. E no oe, eaha ïa te taime maitai aˈe no oe no te taio i te Bibilia?

A FAAHOHONU ATU Â

4. Eaha ta oe e nehenehe e rave ia au oe i ta oe taioraa Bibilia?

E ere paha mea ohie no oe ia haamata i te taio i te Bibilia. Tera râ, e noaa mai te “hiaai,” mai te hoê taata e tamata ra i te hoê maa apî. A taio i te Petero 1, 2:2, e a aparau i teie uiraa:

• Ia taio oe i te Bibilia i te mau mahana atoa, e au anei oe i te reira a hinaaro atu ai e taio hau atu â?

A pata i te VIDEO no te ite mea nafea te tahi mau taata i haamata ˈi i te au i te taio i te Bibilia. E a aparau i te mau uiraa i muri nei.

VIDEO: E te mau taurearea, a here i te Parau a te Atua (5:33)

• I roto i te video, eaha te mau tupuraa ta te feia apî i farerei?

• Na te aha i tauturu ia ratou ia tamau noa i te taio i te Bibilia?

• Eaha ta ratou i rave ia anaanatae atu â ta ratou taioraa Bibilia?

Teie te tahi mau ravea no te haamata:

• A maiti i te hoê huriraa tano maitai. A tamata i te Huriraa o te ao apî mai te peu te vai ra na roto i to oe reo.

• A haamata i te taio i te tahi tuhaa o te Bibilia o ta oe e au roa ˈˈe. No te ite atu â, a hiˈo i te tapura “Ta ˈu taioraa Bibilia i te mahana.”

• A tuu i te nota i ta oe i taio. A faaohipa i te tapura “A tapao i ta oe taioraa Bibilia” i roto i teie buka.

• A faaohipa i te JW Library^®. E nehenehe oe e taio e e faaroo i te Bibilia i te mau vahi atoa maoti te niuniu afaifai aore ra te tahi atu matini.

• A faaohipa i te tuhaa hau i roto i te Huriraa o te ao apî. Te vai ra te mau hohoˈa fenua, tapura e te hoê titionare o te mau taˈo Bibilia, ia anaanatae atu â ta oe taioraa Bibilia.

5. A faaineine i ta oe haapiiraa Bibilia

A taio i te Salamo 119:34, e a aparau i teie uiraa:

• No te aha mea faufaa ia pure hou a taio ai i te Bibilia aore ra a faaineine ai i ta oe haapiiraa Bibilia?

Nafea oe e faufaahia ˈi i ta oe haapiiraa Bibilia tataitahi? Teie e toru ravea no te faaineine i ta oe haapiiraa:

1. A taio i te mau paratarafa matamua o te haapiiraa.

2. A imi e a taio i te mau irava, a tamata i te taa e nafea te reira e tuea ˈi i te haapiiraa.

3. reni i te mau taˈo aore ra pereota faufaa o te pahono ra i te uiraa tataitahi. E tauturu ïa te reira ia oe ia aparau e to oe taata haapii i nia i te haapiiraa.

Ua ite anei oe?

E rave rahi huriraa ta te mau Ite no Iehova i faaohipa. Tera râ, ua haafaufaa ˈtu â ratou i Te Bibilia, Huriraa o te ao apî no te mea mea tano e mea maramarama, e te faaohipa ra teie Bibilia i te iˈoa o te Atua.—A hiˈo i te tumu parau natirara “Te vai ra anei te Bibilia a te mau Ite no Iehova?”

HAAPOTORAA

No te haafaufaa ˈtu â i te taioraa i te Bibilia, a faataa i te taime no te reira, a pure no te taa i ta oe e taio ra e a faaineine i ta oe haapiiraa.

Haamanaˈoraa

• Na te aha i tauturu ia oe ia haafaufaa ˈtu â i te taioraa i te Bibilia?

• Eaha te taime maitai aˈe no oe no te taio e no te haapii i te Bibilia?

• No te aha mea faufaa ia faaineine oe i ta oe haapiiraa Bibilia?

HIˈOPOA

A hiˈo faahou i te tahi mau manaˈo o te tauturu ia oe ia haafaufaa ˈtu â i ta oe taioraa Bibilia.

“E faufaahia oe ia taio i te Bibilia” (Te Pare Tiairaa N^o 1 2017)

A haapii e toru ravea no te taio i te Bibilia.

“E nafea te Bibilia e tauturu ai ia ˈu? (Tuhaa 1): A maimi i roto i ta oe Bibilia” (Tumu parau natirara)

A hiˈo eaha ta oe e nehenehe e rave ia au oe i ta oe taioraa Bibilia.

“E nafea te Bibilia e tauturu ai ia ˈu? (Tuhaa 2): A faaanaanatae i ta oe taioraa Bibilia” (Tumu parau natirara)

A ani i te tauturu i te feia o tei taio i te Bibilia e rave rahi matahiti.

A “mau maite” noa ma te faahohonu i ta oe iho haapiiraa (2:06)