Ua haapii Iesu i ta ˈna mau pǐpǐ e nafea ia pure

Pauroa te mau ohipa ta te mau Pharisea i rave na, no te faatietie ïa ia ratou i mua i te taata. E rave ratou i te maitai ia ite vetahi ê i te reira. E pure ratou i te mau vahi taata ia ite te mau taata atoa ia ratou. E tamau aau te mau Pharisea i te mau pure roroa no te faahiti i te reira i te mau sunago e i te mau poro aroâ ia faaroo te taata ia ratou. Ua maere roa ïa te mau taata a faaroo ai i ta Iesu i parau atu: ‘Eiaha e pure mai te mau Pharisea. Te manaˈo nei ratou e e faahiahia te Atua i ta ratou mau parau rahi, ua hape râ ratou. Te pure, e ohipa ïa i rotopu ia outou e ia Iehova. Eiaha e na nia iho noa i te parau. Te hinaaro ra Iehova ia faaite outou ia ˈna i to outou huru mau.

A pure mai teie: “To matou Metua i te raˈi, ia moˈa to oe iˈoa. Ia tae mai ta oe Faatereraa arii. Ia tupu to oe hinaaro i te fenua nei, mai i te raˈi atoa na.” ’ Ua parau atoa Iesu e mea tia ia pure ratou no te maa no te mahana taitahi, ia faaorehia ta ratou hara e no to ratou iho mau hinaaro.

Ua parau Iesu: ‘A tamau noa i te pure. A tamau i te ani i te mau mea maitai i to outou Metua o Iehova. E hinaaro iho â te mau metua atoa e horoa i te mea maitai i ta ratou tamarii. Mai te peu e e ani mai ta outou tamarii i te pane, e horoa anei outou ia ˈna i te hoê ofai? Ia ani mai oia i te hoê iˈa, e horoa ˈtu anei outou i te hoê ophi?’

I muri iho, ua faataa Iesu i teie haapiiraa: ‘Ua ite outou i te horoa i te mau ô maitatai na ta outou mau tamarii. Hau atu â ïa to outou Metua o Iehova i te horoa i te varua moˈa, e ere anei? Te mea noa te tia ia rave, o te aniraa ˈtu ïa ia ˈna.’ Te pee anei ra oe i ta Iesu aˈoraa? Eaha ta oe e ani a pure ai oe?