Te Aˈoraa i nia i te mouˈa

I muri aˈe i te maitiraa i na aposetolo 12, ua pou maira o Iesu mai nia mai i te mouˈa no te haere i te hoê vahi i haaputuputuhia ˈi te hoê nahoa taata. No ǒ mai ratou mai Galilea, Iudea, Turia, Sidona, Suria e mai te tahi atu pae o Ioridana. Ua afaihia mai te mau taata tei maˈihia e tei uruhia e te mau demoni. Ua faaora Iesu ia ratou pauroa. I muri iho, ua parahi oia i te pae mouˈa e ua haamata oia i te paraparau. Ua faataa Iesu eaha te mea tia ia tatou ia rave no te riro ei hoa no te Atua. E mea tia ia tatou ia taa e mea faufaa roa o Iehova i roto i to tatou oraraa e ia haapii ia here ia ˈna. Tera râ, aita tatou e nehenehe e here i te Atua mai te peu e aita tatou e here ra ia vetahi ê. E mea tia ia riro tatou ei taata mǎrû e te haapao maitai no vetahi ê, oia atoa no to tatou mau enemi.

Ua parau Iesu: ‘Aita e navai ia here i to outou noa mau hoa. E mea titau-atoa-hia ia here i to outou mau enemi e ia faaore i te hapa a vetahi ê ma te aau tae. Mai te peu e ua riri te tahi taata ia outou, a haere oioi e farerei ia ˈna e a tatarahapa ˈtu. Te mau mea atoa ta outou e hinaaro ia rave te taata no outou, a rave atoa ïa no ratou.’

Ua horoa atoa ˈtu Iesu i te mau aˈoraa maitai no nia i te mau mea pae materia. Ua na ô oia: ‘Mea faufaa aˈe ia riro ei hoa no Iehova i te fanaˈoraa i e rave rahi moni. E nehenehe te hoê taata eiâ e rave i ta outou moni. Aita hoê aˈe râ taata o te nehenehe e faaore i to outou auhoaraa e o Iehova. Eiaha e haapeapea noa no nia i ta outou e amu, e inu aore ra e ahu. A hiˈo na i te mau manu. Te haapao noa ra te Atua e e maa ta ratou. Eita outou e ora maoro aˈe ia haapeapea noa outou. A haamanaˈo na, ua ite Iehova eaha to outou mau hinaaro mau.’

Aita roa ˈtu te nahoa taata i faaroo aˈenei i te hoê taata tei paraparau mai ia Iesu. Aita ta ratou mau aratai haapaoraa i haapii atu i tera mau manaˈo. No te aha ua riro Iesu ei orometua rahi? No te mea te mau haapiiraa atoa ta Iesu i horoa ˈtu, no ǒ mai hoi ia Iehova.