Ua fa mai Gaberiela ia Maria

I ora na o Maria i te oire o Nazareta i Galilea. E vahine apî oia e e fetii oia no Elisabeta. Ua momoˈahia Maria ia Iosepha, te hoê tamuta. E ono avaˈe i teie nei to Elisabeta hapûraa. I reira te melahi Gaberiela i fa mai ai ia Maria. Ua parau te melahi: ‘Ia ora na, Maria. Ua mauruuru roa Iehova ia oe.’ Aita Maria i taa i te auraa o ta Gaberiela i parau. Ua parau atura te melahi ia ˈna: ‘E hapû oe e e fanau oe i te hoê tamaiti. O Iesu to ˈna iˈoa. E riro oia ei Arii. E vai ta ˈna Faatereraa arii e a muri noa ˈtu.’

Ua parau atura Maria: ‘Aita hoi au i taoto aˈenei i te hoê tane! E nafea ïa vau e fanau ai i te hoê tamarii?’ Ua pahono atura Gaberiela: ‘E tia te mau mea atoa ia Iehova. E pou mai te varua moˈa i nia ia oe e e fanau oe i te hoê tamaiti. Ua hapû atoa to oe fetii o Elisabeta.’ Ua parau atura Maria: ‘E tavini au na Iehova! Ia tupu te ohipa mai ta oe i parau mai.’

Ua haere Maria i te hoê oire i nia i te mau aivi no te farerei ia Elisabeta. A aroha ˈi Maria ia ˈna, ua hauti te aiû i roto i to Elisabeta opu. Ua î aˈera Elisabeta i te varua moˈa a na ô ai: ‘E Maria e, ua haamaitai Iehova ia oe. E fanaˈoraa taa ê ia haere mai te metua vahine o to ˈu Fatu i to ˈu nei fare.’ Ua parau atura Maria: ‘Te arue nei au ia Iehova ma to ˈu aau atoa.’ Ua vai Maria i ǒ Elisabeta e toru avaˈe i te maoro e i muri iho, ua hoˈi oia i to ˈna fare i Nazareta.

Ua ite ia Iosepha e ua hapû o Maria. Ua hinaaro atura Iosepha ia faataa raua Maria. Ua fa mai râ te hoê melahi ia Iosepha na roto i te hoê moemoeâ no te parau atu: ‘Eiaha e riaria i te faaipoipo ia ˈna. Aita oia i rave i te tahi ohipa ino.’ Ua faaipoipo atura o Iosepha ia Maria.