Mea itoito e mea taiva ore o Ionatana

E faehau itoito mau o Ionatana, te tamaiti paari aˈe a te arii Saula. Ua parau Davida e mea vitiviti aˈe Ionatana i te aeto e e mea puai aˈe oia i te liona. I te hoê mahana, ua ite Ionatana vetahi mau faehau Philiseti i te hoê aivi. Ua parau oia i ta ˈna tavini amo mauhaa: ‘E aro tâua ia ratou i te taime noa e haapapu mai ai Iehova ia na reira. E parau anaˈe to Philiseti ia haere tâua i nia i te aivi, e ite ïa tâua teie te taime no te aro ia ratou.’ Ua tuô atura to Philiseti: ‘A pauma mai e aro!’ Ua pauma atura na tane e piti i te aivi e ua aro raua i na faehau e 20.

Inaha o Ionatana te tamaiti paari aˈe a Saula, o ˈna ïa te tia ia parahi i nia i te terono. Ua ite râ Ionatana e ua maiti Iehova ia Davida no te riro ei arii apî no Iseraela. Aita Ionatana i pohehae aˈe. Ua riro Ionatana raua Davida ei hoa piri. Ua euhe raua ia paruru e ia turu te tahi i te tahi. Ua horoa Ionatana ia Davida i to ˈna iho ahu, oia atoa i ta ˈna ˈoˈe, fana e hatua ei haapapuraa no to raua auhoaraa.

I te taime Davida i horo ê ai ia Saula, ua haere Ionatana e farerei ia ˈna e ua parau atu: ‘A faaitoito. O oe ta Iehova i maiti no te riro ei arii. Ua ite atoa to ˈu metua tane i te reira.’ Te hinaaro ra anei oe e fanaˈo i te hoê hoa maitai mai ia Ionatana?

E rave rahi taime, ua ineine Ionatana i te pohe no te tauturu i to ˈna hoa. Ua ite oia e ua hinaaro te arii Saula e haapohe ia Davida. Ua parau atura oia i to ˈna metua tane: ‘E hara oe mai te peu e e haapohe oe ia Davida. Aita oia i hape aˈe.’ Ua riri roa Saula ia Ionatana. Tau matahiti i muri aˈe, ua pohe Saula raua Ionatana i roto i te hoê tamaˈi.

I muri aˈe i to Ionatana poheraa, ua imi Davida i ta Ionatana tamaiti, o Mephiboseta to ˈna iˈoa. A ite ai Davida ia ˈna, ua parau oia ia Mephiboseta: ‘Ua riro to oe metua tane ei hoa maitai no ˈu. E haapao ïa vau ia oe i te roaraa o to oe oraraa. E noho oe i to ˈu aorai e e tamaa oe i ta ˈu airaa maa.’ Aita roa ˈtu Davida i haamoˈe i to ˈna hoa Ionatana.