Ua faatupu Iakoba raua Esau i te hau

Ua fafau Iehova ia Iakoba e e paruru oia ia ˈna mai ta ˈna i rave no Aberahama e no Isaaka. Ua haere Iakoba e ora i te hoê vahi parauhia Harana. I reira oia i faaipoipo ai e i rahi ai to ˈna utuafare e ta ˈna mau taoˈa.

Ua parau atura Iehova ia Iakoba: ‘A hoˈi i to oe fenua.’ Haamata ˈtura Iakoba e to ˈna utuafare i to ratou tere atea. I muri iho, a tere noa ˈi ratou, ua haere vetahi mau tavini a Iakoba e farerei ia ˈna no te parau atu: ‘Te haere mai ra to oe taeae e e 400 taata o te apee nei ia ˈna!’ Ua manaˈo Iakoba e ua hinaaro Esau e haamauiui ia ˈna e i to ˈna utuafare. Riaria ˈtura oia. Pure atura oia ia Iehova: ‘A faaora mai na ia ˈu i te rima o to ˈu taeae.’ Te mahana i muri iho, ua hapono Iakoba i te hoê ô ia Esau. E rave rahi ïa mamoe, puaaniho, puaatoro, kamela e asini.

I te hoê po, o Iakoba anaˈe, ua ite oia i te hoê melahi! Ua haamata te melahi i te taputô e o ˈna. Ua taputô raua tae roa ˈtu i te poipoi. Noa ˈtu ua pepehia Iakoba, aita oia i tuu. Parau atura te melahi: ‘Vaiiho ia ˈu!’ Ua na ô râ Iakoba: ‘Aita, a haamaitai ia ˈu na mua.’

I te pae hopea, ua haamaitai te melahi ia Iakoba. Taa ˈtura ia Iakoba e aita Iehova e vaiiho ia Esau ia haamauiui ia ˈna.

I tera poipoi, ua hiˈo Iakoba i te atea e ua ite oia ia Esau e na 400 taata. Vaiiho atura Iakoba i to ˈna utuafare i muri roa mai ia ˈna e piˈo atura oia i mua i to ˈna taeae e hitu taime. Horo atura Esau ia Iakoba no te tauahi ia ˈna. Taˈi atura raua toopiti e faatupu atura raua i te hau. No oe, eaha to Iehova huru a ite ai i te haerea o Iakoba i mua i tera tupuraa?

I muri aˈe, ua hoˈi Esau i to ˈna fenua e ua tamau Iakoba i to ˈna tere. E 12 tamaiti ta Iakoba. O Reubena ïa, Simeona, Levi, Iuda, Dana, Naphatali, Gada, Asera, Isakara, Zebuluna, Iosepha e Beniamina. Ua faaohipa Iehova hoê o ta Iakoba mau tamaiti no te faaora i to ˈna nunaa. O Iosepha ïa. Ua ite anei oe eaha ta ˈna i rave? Ta tâua ia e ite i to muri nei haapiiraa.