Na Iakoba i fanaˈo i te faufaa

E 40 matahiti to Isaaka a faaipoipo ai oia ia Rebeka. Ua here roa oia ia ˈna. I muri iho, ua fanau Rebeka e piti tamaiti, e maehaa ïa.

O Esau te tamaiti matahiapo e o Iakoba to ˈna teina. Mea au roa na Esau ia haere na rapae e e taata aˈuaˈu animara aravihi oia. Area o Iakoba, mea au roa na ˈna ia ohipa i te fare.

I taua tau ra, ia pohe te metua tane, e horoahia te rahiraa o te fenua e o te moni i te tamaiti matahiapo. Na ˈna ïa e fanaˈo i te faufaa. No to Isaaka utuafare, i roto i tera faufaa te vai atoa ra te mau mea atoa ta Iehova i fafau ia Aberahama. Aita o Esau i haapao aˈe i taua mau parau fafau ra. Ua ite râ o Iakoba e mea faufaa roa te reira.

I te hoê mahana aˈuaˈuraa animara, ua hoˈi mai Esau i te fare e ua rohirohi roa oia. Ua hauˈa oia i te maa au mau ta Iakoba i tunu. Ua parau Esau: ‘Pohe poia roa vau! Horoa mai na tera maa uteute!’ Na ô atura Iakoba: ‘Na reira! Na mua roa râ, a fafau mai e e horoa oe ia ˈu i ta oe faufaa.’ Pahono atura Esau: ‘Eaha na ˈu tera faufaa? A rave. Hinaaro noa vau e tamaa.’ A feruri na, e faaotiraa î i te paari anei ta Esau i rave? Aita roa ˈtu. Ua vaiiho Esau i te hoê ohipa faufaa roa no te tahi noa maa uteute.

Inaha ua ruau roa Isaaka, e taime tano ïa no ˈna no te haamaitai i ta ˈna tamaiti paari aˈe. Tera râ, ua tauturu Rebeka ia Iakoba, te tamaiti apî aˈe, ia fanaˈo i tera haamaitairaa. I to Esau iteraa i te reira, ua riri roa ˈtura e ua opua ˈtura oia i te haapohe i to ˈna taeae. Ua hinaaro Isaaka e Rebeka e paruru ia Iakoba. No reira raua i parau ai ia ˈna: ‘A haere e ora i ǒ Labana, te taeae o to oe mama, tae roa ˈtu i te taime e pee ai i to Esau riri.’ Ua faaroo Iakoba i te aˈoraa a to ˈna na metua e ua horo ê oia no to ˈna ora.