Te rohi-noa-raa i te faaohipai te mau taleni ei haapiiraa

Tei nia â Iesu i te mouˈa Oliveta e na maha aposetolo i faatia ˈtu ai oia i te tahi atu faahohoˈaraa. Tau mahana na mua ˈtu i Ieriko, ua horoa oia i te faahohoˈaraa o te mina no te faaite e e haamauhia te Faatereraa arii a muri aˈe roa. Fatata hoê â haapiiraa to te faahohoˈaraa ta ˈna e faatia ˈtu ra. Te pahono atoa ra te reira i te uiraa no nia i te tau o to ˈna hoˈiraa mai e te anotau hopea o te faanahoraa o te ao nei. Te haapapu ra te reira e ia rohi noa ta ˈna mau pǐpǐ no tei tuuhia ia ratou e tia ˈi.

Faatia ˈtura Iesu: “E au atoa hoi te Faatereraa arii o te raˈi i te hoê taata hou a reva ˈi i te ara, o tei titau i ta ˈna mau tavini, e tuu atura i ta ˈna mau faufaa ia ratou.” (Mataio 25:14) I te mea e ua faaau aˈena Iesu ia ˈna iho i te hoê taata tei reva i te ara “ia faatoroahia oia ei arii,” ua taa maitai i na aposetolo e o ˈna iho taua “taata” ra.—Luka 19:12.

Hou taua taata ra a reva ˈi i te ara, ua tuu oia i ta ˈna mau faufaa i ta ˈna mau tavini. I te roaraa o ta ˈna taviniraa e toru matahiti e te afa, ua tutava na mua Iesu i te poro i te parau apî oaoa o te Faatereraa arii a te Atua e ua faaineine i ta ˈna mau pǐpǐ no teie ohipa. Te reva ra râ oia, ma te tiaturi e e tamau ratou i te rave i te mea ta ˈna i faaineine ia ratou.—Mataio 10:7; Luka 10:1, 8, 9; a hiˈo i te Ioane 4:38; 14:12.

Mea nafea te taata i te opereraa i ta ˈna mau faufaa? Faatia ˈtura Iesu: “Ua horoa oia e pae taleni na te hoê, e piti na te tahi e hoê na te tahi atu, ia au i tei tia ia ratou tataitahi ia haapao, e reva ˈtura oia i te ara.” (Mataio 25:15) Ua aha teie mau tavini i tei tuuhia ia ratou? Ua rohi anei ratou i te faaohipa i teie mau faufaa ia apî to ratou fatu? Parau atura Iesu i na aposetolo:

“Haere oioi ihora te tavini tei horoahia ˈtu e pae taleni e faaohipa i te reira ia hoona mai e ua apî mai oia e pae atu â taleni. Oia atoa te tavini tei horoahia ˈtu e piti, ua apî mai ïa e piti atu â taleni. Area te tavini tei horoahia ˈtu hoê noa taleni, ua haere ïa e ô i te apoo e huna ˈtura i te moni a to ˈna fatu.” (Mataio 25:16-18) Eaha tei tupu i te hoˈiraa mai te fatu?

Na ô atura Iesu: “I muri aˈe roa, hoˈi maira te fatu o taua mau tavini ra e titau ihora i ta ˈna moni.” (Mataio 25:19) Ua rohi na tavini matamua “ia au i tei tia ia [raua] tataitahi ia haapao,” a imi ai i te apî ma te faaohipa i tei tuuhia ia raua. Ua tataipiti te taleni a tei tuuhia e pae taleni, na reira atoa ta tei tuuhia e piti. (I tera tau, e noaa i te tahi taata hoê taleni ia rave oia i te ohipa 19 matahiti.) Hoê â parau haapopou ta ˈna i na tavini tataitahi: “Maitai roa, e tavini afaro oe e te haapao maitai! Ua haapao maitai oe vetahi o ta ˈu mau ohipa. E faatoroa vau ia oe ei tiaau i te mau mea rahi atu â. Ia oaoa atoa oe e to oe fatu.”—Mataio 25:21.

E ere râ hoê â huru no te tavini tei tuuhia hoê taleni. Parau maira oia: “E te Fatu, ua ite au e e taata etaeta oe, o te ooti i ta oe i ore i ueue e o te haaputu i ta oe i ore i tanu. Mǎtaˈu ihora vau e haere atura vau e huna i ta oe taleni i roto i te repo. Tera mai ta oe taleni.” (Mataio 25:24, 25) Aita oia i hopoi noa ˈˈe i te moni i te fare moni ia apî rii mai to ˈna fatu. Ua mâuˈa ïa te faufaa a to ˈna fatu ia ˈna.

Ua tano te fatu i te parau ia ˈna e “tavini ino e te faatau.” Iriti-ê-hia maira ta ˈna, e horoahia ˈtura i te tavini ua ineine i te rohi atu â. Na ô atura te fatu: “Te taata hoi e faufaa ta ˈna, e horoahia ˈtu â ïa ta ˈna e e rahi atu â. Te taata râ aita ta ˈna e faufaa, e iriti-ê-atoa-hia ïa ta ˈna.”—Mataio 25:26, 29.

Mea rahi te haapiiraa ta te mau pǐpǐ a Iesu e nehenehe e feruriruri, no nia atoa i teie faahohoˈaraa. Te taa ra ia ratou e mea faufaa roa ta Iesu i tuu ia ratou, oia hoi te haamaitairaa e faariro i te taata ei pǐpǐ, e te tiai ra oia ia ratou ia rohi i te haapaoraa i teie haamaitairaa. Aita Iesu e parau ra e ia aifaito ta ratou paatoa e rave no te ohipa pororaa ta ˈna i faaue ia ratou. I roto i teie faahohoˈaraa, ia rohi te taata atoa “ia au i tei tia ia ratou tataitahi.” Te auraa, eita roa ˈtu Iesu e mauruuru i te tahi taata “faatau” o te ore e imi ma to ˈna puai atoa i te apî i nia i te faufaa a to ˈna Fatu.

Eaha paha na aposetolo i te oaoa i teie haapapuraa: “Te taata . . . e faufaa ta ˈna, e horoahia ˈtu â ïa ta ˈna e e rahi atu â”!