Aita Iesu i noaa i te râmâhia

Ua inoino te mau aratai haapaoraa ia Iesu, tei faatia iho nei i te tahi mau faahohoˈaraa tei faaite roa i to ratou ino. Opua aˈera te mau Pharisea i te râmâ ia ˈna. Ua imi ratou i te ravea ia parau oia i te tahi parau a tuuhia ˈtu ai oia i te tavana Roma, e ua aufau i vetahi o ta ratou mau pǐpǐ no te râmâ ia ˈna.—Luka 6:7.

Na ô maira ratou: “Orometua, ua ite matou e e parau mau ta oe e faahiti e e haapii ia vetahi ê. E ore oe e maitiiti i te taata e te haapii nei oe ia vetahi ê i te eˈa o te Atua ma te parau mau: Mea tano anei ia au i te ture ia aufau matou i te tute ia Kaisara aore ra eita?” (Luka 20:21, 22) Aita Iesu i vare i ta ratou parau faatietie, e parau haavarevare hoi no te râmâ. Ia parau oia, ‘Eita, e ere mea tano ia aufau i taua tute ra,’ e nehenehe oia e parihia i te orure i te hau Roma. E ia parau oia, ‘E, a aufau i taua tute ra,’ e manaˈo paha ïa te nunaa e te turu ra oia i te hau Roma mea au ore na ratou, a rave ino atu ai ia ˈna. Eaha ïa ta ˈna i parau?

Na ô atura Iesu: “Eaha outou e râmâ mai ai ia ˈu, haavarevare ma? Faaite mai na i te moni aufau tute.” Horoa maira ratou i te hoê denari, e ui atura oia: “No vai te hohoˈa e te iˈoa i nia iho?” Pahono maira ratou: “No Kaisara.” Horoa ˈtura Iesu i teie faaueraa faahiahia mau: “A faahoˈi ïa i ta Kaisara ia Kaisara ra, ta te Atua râ i te Atua ïa.”—Mataio 22:18-21.

Maere ihora taua mau taata ra i ta Iesu pahonoraa tano maitai, mamû noa aˈera e reva ˈtura. Aita râ ratou i faaea i te râmâ ia ˈna e hope noa ˈtu taua mahana ra. Aita te mau Pharisea i manuïa. Tapiri maira ïa te mau aratai o te tahi atu pǔpǔ faaroo ia Iesu.

Ui maira te mau Sadukea, o te parau ra e aita e tia-faahou-raa, no nia i te tia-faahou-raa e te faaipoiporaa i te vahine faaipoipo a to ˈna taeae tei pohe. Ua na ô ratou: “Orometua, ua parau Mose: ‘Ia pohe te hoê tane ma te tamarii ore, ia faaipoipo ïa to ˈna taeae i ta ˈna vahine e tia ˈi e ia fanau mai ta ˈna ei tamarii na to ˈna taeae i pohe.’ I vai na hoi e hitu taeae i ǒ matou. Faaipoipo ihora te matahiapo e pohe atura, e no te mea aita e tamarii ta ˈna, faaipoipo ihora to ˈna teina i ta ˈna vahine. Na reira atoa te piti e te toru e tae noa ˈtu i te hitu. Pohe atoa ˈtura te vahine. I te tia-faahou-raa, ei vahine oia na vai i rotopu i na hitu? Ua faaipoipo hoi ratou paatoa ia ˈna.”—Mataio 22:24-28.

Ma te faahiti i ta Mose i papai, ta te mau Sadukea e farii ra, pahono atura Iesu: “E ere anei no to outou ite ore i te mau Papai e e nafea te mana o te Atua e ohipa ˈi i hape ai outou? Ia tia mai hoi ratou mai te pohe mai, e ore te mau tane e faaipoipo e te mau vahine e horoahia ia faaipoipo, e riro râ ratou mai te mau melahi i te raˈi. No te feia pohe râ o te faatia-faahou-hia mai, aita outou i taio i roto i te buka a Mose no nia i te raau taratara e ura ra, ua parau te Atua ia Mose: ‘O vau te Atua o Aberahama e te Atua o Isaaka e te Atua o Iakoba’? E Atua oia no te feia ora, eiaha no te feia pohe. Ua hape roa outou.” (Mareko 12:24-27; Exodo 3:1-6) Maere ihora te nahoa i taua pahonoraa ra.

Ua haamamû Iesu i te mau Pharisea e Sadukea. Râmâ faahou maira teie na pǔpǔ faaroo patoi ia ˈna. Ui maira te hoê papai parau: “Orometua, teihea te faaueraa rahi roa ˈˈe i roto i te ture a Mose?”—Mataio 22:36.

Pahono atura Iesu: “Te faaueraa rahi roa ˈˈe, teie ïa: ‘A faaroo mai, e Iseraela, to tatou Atua ra o Iehova, hoê anaˈe ïa Iehova, e ia here oe ia Iehova to Atua ma to aau atoa, ma to ora atoa, ma to manaˈo atoa e ma to puai atoa.’ Teie te piti: ‘Ia here oe i to oe taata tupu mai ia oe iho.’ Aita ˈtu e faaueraa rahi aˈe i teie e piti.”—Mareko 12:29-31.

I to ˈna faarooraa i te pahonoraa, na ô maira te papai parau: “Orometua, o te parau mau ta oe e faahiti mai nei: ‘Hoê anaˈe Atua, aita ˈtu,’ e te hereraa ia ˈna ma te aau atoa, ma te feruriraa atoa e ma te puai atoa e te hereraa i te taata tupu mai ia ˈna iho, ua hau aˈe ïa i te mau tusia taauahi e te mau tusia animara atoa.” Taa ihora ia Iesu te paari o ta ˈna pahonoraa, e na ô atura: “Aita oe i atea roa i te Faatereraa arii a te Atua.”—Mareko 12:32-34.

E toru mahana (9, 10 e 11 no Nisana) to Iesu haapiiraa i te taata i te hiero. Ua faaroo vetahi, mai teie papai parau, ia ˈna ma te au, aita râ te mau aratai haapaoraa, tei taiâ i te ui faahou ia ˈna.