Oaoaraa i te tatarahaparaa te taata rave hara

I roto i ta Iesu taviniraa, pinepine oia i te haamanaˈo i te faufaaraa o te haehaa. (Luka 14:8-11) Ua hinaaro mau oia ia itehia mai ia ˈna te tane e te vahine e hinaaro ra e tavini i te Atua ma te haehaa. E tae roa i tera taime o ta ˈna taviniraa, ua matauhia vetahi o ratou ei feia rave hara.

Ua tapao te mau Pharisea e papai parau e tera mau taata ta ratou e haafaufaa ore ra, mea au na ratou ia Iesu e ta ˈna poroi. Ohumu aˈera ratou: “Te farii maitai ra teie taata i te feia rave hara e te tamaa ra e o ratou.” (Luka 15:2) I manaˈo na ratou e mea hau aˈe ratou, e i faariro na i te taata riirii mai te repo i raro aˈe i to ratou avae. No to ratou vahavaha ia ratou, e faahiti te mau aratai haapaoraa i te parau Hebera amahaareta, oia hoi e “taata no te fenua [repo].”

Area Iesu, e faatura ïa i te taata atoa ma te hamani maitai atu e te aumihi, i hinaaro ai e rave rahi taata riirii, oia atoa te taata rave hara, e faaroo i ta ˈna mau parau. Eaha râ te huru aau o Iesu i te faahaparaahia oia no to ˈna tautururaa i te feia riirii, e ua aha ˈtura oia?

Taa-maitai-hia ˈtura te pahonoraa a faahiti ai Iesu i te hoê faahohoˈaraa putapû, hoê â e ta ˈna i faahiti aˈena i Kaperenaumi. (Mataio 18:12-14) I roto i te faatiaraa a Iesu, e au ra e e feia parau-tia te mau Pharisea e te parahi hau noa ra ratou i roto i te nǎnǎ mamoe a te Atua. Area te feia riirii, mai te huru ra e ua atea ê e ua moˈe ratou. Na ô atura Iesu:

“O vai ïa taata i rotopu ia outou 100 mamoe ta ˈna, ia moˈe te hoê, e ore e vaiiho i na 99 i te medebara, a imi atu ai i tei moˈe e ia itehia ˈtu? E ia itehia ia ˈna, e amo oia i taua mamoe ra i nia i to ˈna tapono ma te oaoa. E ia tae oia i te fare, e titau oia i to ˈna mau hoa e te feia tapiri atoa a na ô ai: ‘Mai oaoa anaˈe, ua itea mai hoi ia ˈu ta ˈu mamoe i moˈe na.’”—Luka 15:4-6.

Eaha te haapiiraa ta Iesu e horoa mai ra? Faataa ˈtura oia: “Te parau atu nei au, e oaoa rahi atoa tei te raˈi no te hoê noa taata rave hara e tatarahapa, eiaha râ no na 99 taata parau-tia e manaˈo ra e aita e faufaa ia tatarahapa ratou.”—Luka 15:7.

Eita e ore e ua huru ê roa te mau Pharisea i to Iesu faahitiraa i te tatarahapa. No ratou, e feia parau-tia ratou, aita ïa e faufaa ia tatarahapa ratou. I to vetahi o ratou faahaparaa ia Iesu e piti matahiti na mua ˈtu no to ˈna tamaaraa e te feia titau tute e te feia rave hara, pahono atura oia: “Ua haere mai hoi au e titau i te feia rave hara ia tatarahapa, eiaha râ te feia parau-tia.” (Mareko 2:15-17) No te mau Pharisea faahua parau-tia, aita e faufaa ia tatarahapa, aita ïa e oaoa tei te raˈi no ratou. E oaoa râ tei te raˈi ia tatarahapa mau te feia rave hara.

No te haapapu i te manaˈo e e oaoa rahi tei te raˈi ia maitai faahou mai te feia rave hara i moˈe na, horoa ˈtura Iesu i te tahi atu faahohoˈaraa o te tupu ra i roto i te hoê utuafare: “O vai atoa ïa vahine hoê ahuru moni ario ta ˈna, ia moˈe te hoê, e ore e tutui i te mori, a purumu atu ai i to ˈna fare e a paimi maitai atu ai e ia iteahia ˈtu? E ia itehia ia ˈna, e titau oia i to ˈna mau hoa e te feia tapiri atoa a na ô ai: ‘Mai oaoa anaˈe, ua itea mai hoi ia ˈu te moni ario i moˈe na ia ˈu.’”—Luka 15:8, 9.

Hoê â haapiiraa ta ˈna i horoa mai no teie faahohoˈaraa e no te faahohoˈaraa o te mamoe i moˈe na: “E oaoa te mau melahi a te Atua no te hoê noa taata rave hara e tatarahapa.”—Luka 15:10.

A feruri na, te tâuˈa mau ra ta te Atua mau melahi i te feia rave hara ia maitai faahou mai ratou! E parau faahiahia teie no te mea ia tatarahapa te hoê taata rave hara a roaa mai ai ia ˈna te hoê parahiraa i roto i te Faatereraa arii a te Atua, e roaa ïa i taua taata ra te hoê tiaraa hau aˈe i to te mau melahi! (Korinetia 1, 6:2, 3) Aita râ te mau melahi e pohehae ra. Ia aha ïa tatou ia tatarahapa mau te hoê taata rave hara a fariu atu ai i te Atua?