Ora-faahou-raa mai te hoê tamahine!

Ua ite roa ˈtu Iaeiro e ua ora te tapahi o te vahine ia Iesu. E ora atoa ïa ia Iesu te maˈi o ta ˈna tamahine, noa ˈtu e i to ˈna manaˈo “ua pohe atura paha ïa ta ˈ[na] tamahine.” (Mataio 9:18) E nehenehe noa anei râ e faahoˈi mai ia ˈna i te ora?

A paraparau noa ˈi Iesu i te vahine ua ora to ˈna tapahi, tae maira te tahi mau tane na te fare mai o Iaeiro e parau maira: “Ua pohe to tamahine!” Na ô atoa maira ratou: “Eiaha e haapeapea faahou i te Orometua.”—Mareko 5:35.

Auê te peapea e! Ua oti roa teie tane faatura-rahi-hia e to te oire. Tera anaˈe hoi ta ˈna tamarii e ua pohe. Faaroo ihora râ Iesu i ta ratou parau, fariu atura oia ia Iaeiro e parau atura ma te faaitoito: “Eiaha oe e mǎtaˈu, a faatupu noa râ i te faaroo.”—Mareko 5:36.

Apee atura Iesu ia Iaeiro i to ˈna fare. I to raua taeraa ˈtu, mea maniania roa. Te taˈi ra te feia i ruru mai, te auê ra, e te tupaipai ra i to ratou ouma no te oto. Tomo ihora Iesu i roto i te fare e parau atura i te hoê parau maere mau: “Aita te potii i pohe, te taoto ra râ.” (Mareko 5:39) I to te taata faarooraa ˈtu, ata aˈera ratou ia Iesu. Ua ite ratou e ua pohe iho â te tamahine. Tera râ, maoti te mana no ǒ mai i te Atua, e faaite Iesu e e nehenehe te taata pohe e faahoˈihia mai i te ora, mai te taata e taoto ra e nehenehe e faaarahia.

Faaue atura Iesu ia tuuhia te taata atoa i rapaeau, e tapea maira ia Petero, Iakobo, Ioane e na metua o te tamahine tei pohe, e tomo atura ratou i roto i te piha to reira te tamahine. Rave ihora oia i te rima o te tamahine e na ô atura: “‘Talita kumi,’ teie te auraa ia hurihia: ‘E teie nei tamahine iti, te parau atu nei au ia oe: A tia mai!’” (Mareko 5:41) I reira iho, tia maira te tamahine e hahaere ihora. Oaoa roa ihora Iaeiro e ta ˈna vahine faaipoipo. No te haapapu â e te ora ra iho â te tamahine, parau atura Iesu ia horoahia te maa na ˈna.

Na mua ˈtu, i faaue na Iesu i te feia ta ˈna i faaora te maˈi eiaha e faatia haere i ta ˈna i rave no ratou. Ta ˈna atoa ïa i faaue i na metua. Tera râ, atutu atura teie parau “e ati aˈe taua tuhaa fenua ra.” (Mataio 9:26) Eita anei oe e ru atoa i te faatia haere e ua faahoˈihia mai te hoê taata herehia i te ora? Teie te piti o te tia-faahou-raa tei papaihia ta Iesu i faatupu.