Haereraa Iesu i te rahiraa e Ioane i te itiraa

I muri aˈe i te oroa Pasa 30, faarue maira Iesu e ta ˈna mau pǐpǐ i Ierusalema. Aita râ ratou i hoˈi tia ˈtu i ǒ ratou i Galilea. Haere aˈera ratou i te tuhaa fenua o Iudea, a bapetizo atu ai e rave rahi taata. I rave atoa na Ioane Bapetizo i taua ohipa ra piri i te hoê matahiti i te peho paha o te anavai Ioridana. Tei pihai iho noa ia ˈna vetahi o ta ˈna mau pǐpǐ.

Aita Iesu iho i bapetizo i te taata, na ta ˈna râ mau pǐpǐ i raro aˈe i ta ˈna aratairaa. I taua taime ra o ta Iesu taviniraa, te haapii ra Iesu e Ioane i te ati Iuda, tei tatarahapa i te hararaa i te faufaa ta te Atua i faaau ia Iseraela, oia hoi te ture a Mose.—Ohipa 19:4.

Tera râ, pohehae ihora ta Ioane mau pǐpǐ, a amuamu ai ia Iesu ia Ioane ra: “Te taata [ra o Iesu] tei haere atu ia oe ra . . . te bapetizo nei ïa i te taata e te haere nei te taata atoa ia ˈna ra.” (Ioane 3:26) O Ioane râ, aita ïa i pohehae. Ua oaoa oia i te haereraa Iesu i te rahiraa e ua hinaaro ia oaoa atoa ta ˈna mau pǐpǐ. Haamanaˈo atura oia ia ratou: “Ua ite outou e i parau na vau: E ere au i te Mesia, teie râ ua tonohia mai au ia na mua ia ˈna.” Horoa ˈtura oia i te tahi faahohoˈaraa ia taa ia ratou pauroa: “Te taata na ˈna te vahine, o te tane faaipoipo ïa. Ia tia râ te hoa o te tane faaipoipo, a faaroo atu ai i to ˈna reo, e oaoa roa ïa oia. Ua hope roa ïa vau i te oaoa.”—Ioane 3:28, 29.

I oaoa na Ioane, mai te hoa o te tane faaipoipo, tau avaˈe na mua ˈtu, i te faaiteraa ˈtu i ta ˈna mau pǐpǐ ia Iesu. Ua pee vetahi o ratou ia Iesu, e i te taime faataahia ua faatavaihia ratou i te varua moˈa. Hinaaro ihora Ioane ia pee atoa ta ˈna iho mau pǐpǐ ia Iesu. Inaha, ta Ioane fa, te faaineineraa ïa i te eˈa no te taviniraa a te Mesia. Ua faataa Ioane: “E haere oia i te rahiraa e tia ˈi, o vau nei râ, i te itiraa ïa.”—Ioane 3:30.

Ua papai te tahi atu Ioane tei pee na ia Iesu, nohea mai Iesu e eaha ta ˈna hopoia rahi i roto i te faaoraraa i te taata: “O te haere mai no nia mai, ua hau aˈe ïa i te taata atoa. . . . Mea here na te Metua i te Tamaiti e ua tuu oia i te mau mea atoa i roto i to ˈna rima. Te taata e faatupu i te faaroo i te Tamaiti, e fanaˈo ïa i te ora mure ore. Te taata e ore e faaroo i te Tamaiti, e ore ïa e ite i te ora, e vai mai râ te riri o te Atua i nia ia ˈna.” (Ioane 3:31, 35, 36) E parau mau faufaa roa teie ia ite te taata.

I muri iho i to Ioane Bapetizo faataaraa e ia iti mai ta ˈna hopoia e ohipa, tapeahia ihora oia e te arii Heroda. Ua rave hoi Heroda ia Herodia, te vahine faaipoipo a Philipa to ˈna taeae ei vahine na ˈna. Faahapa ihora Ioane i ta ˈna ohipa faaturi, e faaue ihora Heroda ia tuuhia Ioane i roto i te fare tapearaa. I to Iesu faarooraa e ua tapeahia Ioane, faarue maira Iesu i Iudea e ta ˈna mau pǐpǐ e reva ˈtura i Galilea.—Mataio 4:12; Mareko 1:14.