Te eˈa, te parau mau, te ora

Papu roa mea au na oe te parau apî oaoa. Te vai ra te tahi parau apî oaoa roa no oe e no tei herehia e oe.

To roto ïa i te Bibilia, te hoê buka ta te Atua poiete o te ao taatoa ra o Iehova i haapapai mea maoro i teie nei. E tatara mai teie buka Iesu te eˈa, te parau mau, te ora e maha buka Bibilia e parau apî oaoa roa to roto no tatou pauroa. Ua topahia na buka i te iˈoa o te mau tane ta te Atua i faaohipa: Mataio, Mareko, Luka e Ioane.

Ua matau te taata i te parau na Evanelia e maha. Te faatia ra teie mau buka i te evanelia, aore ra parau apî oaoa, no nia ia Iesu. Na roto ia ˈna e faaora ˈi te Atua i te huitaata. E ei Arii o te Faatereraa arii a te Atua i te raˈi, e haamaitai Iesu e a muri noa ˈtu i te feia atoa o te faatupu i te faaroo ia ˈna.—Mareko 10:17, 30; 13:13.

NO TE AHA E MAHA EVANELIA?

Te ui ra paha oe no te aha te Atua i haapapai ai i raro aˈe i te aratairaa a to ˈna varua e maha faatiaraa o to Iesu oraraa e ta ˈna mau haapiiraa.

E maitai te noaa mai. A feruri na e maha tane na pihai iho i te hoê orometua tuiroo. E fare aufauraa tute ta te tane e tia ra i mua i te orometua. E taote te tane i te pae atau. E ravaai te tane e faaroo ra i te pae aui, e hoa rahi atoa no te orometua. E te maha i muri mai, mea apî aˈe ïa e te mataitai noa ra. E tane afaro anaˈe ratou, e ere râ hoê â parau aore ra ohipa ta ratou i faahiahia aore ra i haafaufaa. Ia papai ratou tataitahi i ta te orometua i parau e i rave, papu roa ïa mea taa ê rii ta ratou huru faatiaraa. Ia hiˈopoahia râ na faatiaraa e maha, e puta mai ïa te hohoˈa taatoa o ta te orometua i parau e i rave. Te faataa ra teie hiˈoraa i te maitai e noaa mai i te faatiaraahia te oraraa o te Orometua Rahi ra o Iesu i roto e maha buka.

No te mau ati Iuda ta te titau tute faatiaraa, e papai ïa oia i te tahi mau haapiiraa aore ra tupuraa e putapû ai ratou. Area te taote o te haafaufaa i te oraraa te maˈi, eita ïa o ˈna e faahiti i te tahi mau parau a te titau tute aore ra e faatia mai ta te titau tute i apǎpǎ. E haafaufaa te hoa rahi i te mau huru aau e huru maitatai o te orometua. Te faatiaraa a te tane apî aˈe, mea poto aˈe ïa. Mea tano râ te faatiaraa tataitahi. Maoti ïa teie na faatiaraa e maha o to Iesu oraraa e taa maitai atu â ia tatou ta ˈna mau ohipa, haapiiraa e to ˈna huru.

E parau paha vetahi “te Evanelia a Mataio” aore ra “te Evanelia a Ioane.” Aita ratou i hape, e “parau apî oaoa” hoi to roto “no nia ia Iesu Mesia.” (Mareko 1:1) Te tanoraa râ, hoê anaˈe evanelia, aore ra parau apî oaoa, no nia ia Iesu i roto i na faatiaraa e maha.

E rave rahi taata haapii i te Parau a te Atua tei faaau e tei faatuati i te mau tupuraa e aamu faatiahia e Mataio, Mareko, Luka e Ioane. Ta te hoê taata papai ïa no Suria i tutava i te rave i te area matahiti 170. No ˈna, mea tano roa na buka e maha e mea papaihia i raro aˈe i te aratairaa a te varua o te Atua. Ua amui pauroa oia i te faatiaraa o to Iesu oraraa e ta ˈna taviniraa i roto hoê noa buka (Diatessaron).

Mai tera atoa no teie buka Iesu te eˈa, te parau mau, te ora. Mea tano aˈe râ te faatiaraa taatoa a teie buka. Te taa maitai aˈe nei ia tatou te tupuraa o ta Iesu parau tohu e faahohoˈaraa e rave rahi. Auaˈe te reira i maramarama ˈi tatou i ta ˈna i parau e i rave, oia atoa te faatiaraa ia au i to ratou tupuraa. Ua haamaramarama atoa mai ta te tahi mau ihipǎpǎ i ite mai i te tahi mau parau a te feia papai e ta ratou huru hiˈoraa. Parau mau, eita ta tatou e nehenehe e haapapu i te apǎpǎraa o te mau tupuraa atoa. Tera râ, mea tano noa te huru faatiaraa a teie buka Iesu te eˈa, te parau mau, te ora.

TE EˈA, TE PARAU MAU, TE ORA

A taio ai oe i teie buka, a tapea mai i te poroi faufaa roa no oe e no tei herehia e oe. A haamanaˈo i ta Iesu Mesia iho i parau i te aposetolo Toma: “O vau te eˈa e te parau mau e te ora. Aore roa e taata e tae i te Metua ra, na roto noa râ ia ˈu.”—Ioane 14:6.

Maoti teie buka Iesu te eˈa, te parau mau, te ora, e taa ia oe o Iesu iho â “te eˈa.” Na roto ia ˈna anaˈe e nehenehe ai e faafatata ˈtu i te Atua ra o Iehova maoti te pure. O ˈna atoa te eˈa e faahau ai tatou e te Atua. (Ioane 16:23; Roma 5:8) Na roto ïa ia Iesu anaˈe e fariihia ˈi tatou e te Atua, a faahoa ˈtu ai ia ˈna.

O Iesu “te parau mau.” Ua faaite oia i te parau mau e ua ora ia au i te reira, mai te huru ra na roto ia ˈna i faaitehia mai ai te parau mau. Ua faatupu oia e rave rahi parau tohu tei “riro anaˈe ïa ei ‘e’ na roto ia [ˈna].” (Korinetia 2, 1:20; Ioane 1:14) Maoti teie mau parau tohu e ite ai tatou i ta ˈna hopoia rahi i roto i te tupuraa o ta te Atua opuaraa.—Apokalupo 19:10.

E o Iesu Mesia “te ora.” Maoti te hoo, to ˈna horoaraa i to ˈna ora e toto tia roa, e nehenehe ai tatou e fanaˈo i “te ora mau,” oia hoi “te ora mure ore.” (Timoteo 1, 6:12, 19; Ephesia 1:7; Ioane 1, 1:7) O ˈna atoa “te ora” no te mau mirioni taata tei pohe o te faatiahia mai ma te tiaturi e ora i roto i te paradaiso e a muri noa ˈtu.—Ioane 5:28, 29.

Mea titauhia ia taa e ia haafaufaa tatou i ta Iesu hopoia i roto i te opuaraa a te Atua. Eita e ore e oaoa oe i te ite atu â no nia ia Iesu “te eˈa e te parau mau e te ora.”