A haamori ia Iehova e to utuafare

Mai ta oe i haapii i roto i teie buka rairai, mea rahi te aratairaa Bibilia no te tauturu ia oe e to utuafare. Te hinaaro ra Iehova ia oaoa oe e te fafau ra oia e ia haamori oe ia ˈna na mua roa, ‘e amui-atoa-hia mai te mau mea ia oe.’ (Mataio 6:33) Te hinaaro mau ra oia ia riro oe ei hoa no ˈna. A haafaufaa ïa i te mau ravea atoa no te faatupu i te taairaa e te Atua. Tera te fanaˈoraa rahi roa ˈˈe no te taata.—Mataio 22:37, 38.

1 MA TE FAATUPU I TE TAAIRAA PIRI E O IEHOVA

TA TE BIBILIA E PARAU RA: Te na ô ra Iehova: “E ei metua vau no outou, e ei tamarii tamaroa outou na ˈu e ei tamarii tamahine.” (Korinetia 2, 6:18) Te hinaaro ra te Atua ia riro oe ei hoa piri roa no ˈna. O te pure te tahi ravea. Te titau manihini ra Iehova ia oe ia pure tamau ia ˈna. (Tesalonia 1, 5:17) Ua ineine roa o ˈna i te faaroo ia faaite atu oe i to mau manaˈo e te haapeapea ra ia oe. (Philipi 4:6) Ia pure oe e te mau melo o to utuafare, e ite ratou e e taairaa piri to oe e te Atua.

E titau-atoa-hia ia faaroo oe ia Iehova. E na reira oe a haapii ai i ta ˈna Parau e te mau papai Kerisetiano. (Salamo 1:1, 2) A feruriruri atoa i ta oe e haapii ra. (Salamo 77:11, 12) No te faaroo i te Atua, e titau-atoa-hia ia haere tamau i te mau putuputuraa Kerisetiano.—Salamo 122:1-4.

E maitai atu â to taairaa e te Atua ia paraparau oe ia vetahi ê no nia ia Iehova. Rahi atu â oe i te na reira, rahi atu â oe i te piri ia ˈna.—Mataio 28:19, 20.

TA OE E NEHENEHE E RAVE:

• I te mau mahana atoa, a faataa i te taime no te taio i te Bibilia e no te pure

• Ia haafaufaa na mua roa to utuafare i te haamoriraa i te Atua eiaha râ i te faaanaanataeraa e te faafaaearaa

2 MA TE HAAFAUFAA I TE HAAMORIRAA UTUAFARE

TA TE BIBILIA E PARAU RA: “E haafatata ˈtu i te Atua, e na ˈna e haafatata mai.” (Iakobo 4:8) Mea au ia faanaho i ta oe porotarama no te haamoriraa utuafare, e titau-atoa-hia râ ia haapao i te reira. (Genese 18:19) E navai noa ra anei? Eita, e mea tia atoa ia vaiiho i te Atua ia aratai i to oe oraraa. A tauturu i to utuafare ia faatupu i te taairaa piri e te Atua ma te paraparau atu “ia parahi noa oe i roto i te fare, e ia haere noa oe na te eˈatia ra, e ia taoto noa oe ra, e ia tia noa oe i nia.” (Deuteronomi 6:6, 7) A faaoti papu mai ia Iosua tei na ô:“ Area vau e to ˈu atoa ra utuafare, e haamori ïa matou ia Iehova.”—Iosua 24:15.

TA OE E NEHENEHE E RAVE:

• A faaineine tamau i te porotarama ma te haapao i te hinaaro o te mau melo atoa o to utuafare