Ua hinaaro Rebeka ia oaoa Iehova

E vahine here ia Iehova o Rebeka mai ta ˈna ra tane Isaaka. Mea nafea raua i te matauraa? Mea nafea Rebeka i faaite ai e ua hinaaro o ˈna ia oaoa Iehova? E hiˈo anaˈe i te huru o Rebeka.

O Aberahama e Sara na metua o Isaaka. I te fenua Kanaana, i ora na ratou e te taata i ore i haamori ia Iehova. Ua hinaaro ïa Aberahama ia faaipoipo ta ˈna tamaiti i te hoê vahine e haamori ia Iehova. O Eliezera paha te tavini ta ˈna i tono no te imi i te vahine na Isaaka i Harana, te fenua e ora ˈi te fetii o Aberahama.

Mea atea roa te vahi i terehia ˈi e Eliezera e te tahi atu mau tavini a Aberahama. Ua rave ratou ahuru kamela no te hopoi i te maa e te mau taoˈa horoa noa. E nafea Eliezera e ite ai i te vahine e maiti na Isaaka? A tae ai i Harana, ua haere o ˈna e te mau tavini i te tahi apoo pape no to ˈna ite e fatata te mau vahine i te tae mai no te huti i te pape. Pure atura oia ia Iehova e na ô aˈera: ‘Ia ani au i te tahi vahine apî ia horoa mai i te pape na ˈu e ia farii oia i te na reira na ˈu e no te mau kamela, e ite ïa vau e tera te vahine ta oe i maiti.’

I muri iho, haere mai nei te vahine apî ra o Rebeka i te apoo pape. Te faaite ra te Bibilia e mea nehenehe roa o ˈna. Ani atura Eliezera maa pape na ˈna e ua parau mai nei te vahine ia ˈna: ‘E! E haere au e huti i te pape na oe e na te mau kamela.’ A feruri na ehia taime to Rebeka hororaa e huti i te pape na te mau kamela tei poihâ roa! A hiˈo na i te hohoˈa, te ite ra anei oe ia ˈna e ohipa ra?— Ua maere roa Eliezera, ua pahono hoi Iehova i ta ˈna pure.

Ua horoa Eliezera e rave rahi taoˈa maitai na Rebeka. Ua titau manihini atura te vahine ia ˈna e te tahi atu mau tavini ia haere i te fare o to ˈna metua tane. I reira, faataa aˈera Eliezera i te tumu i tonohia ˈi o ˈna e Aberahama e mea nafea Iehova i pahono ai i ta ˈna pure. Ua oaoa e ua farii te utuafare o Rebeka ia faaipoipo o ˈna ia Isaaka.

I to oe manaˈo, ua hinaaro atoa anei Rebeka e faaipoipo ia Isaaka?— Ua ite Rebeka e na Iehova i tono mai ia Eliezera. A ani atu ai to ˈna utuafare e e hinaaro anei oia e haere i Kanaana e faaipoipo ia Isaaka, ua na ô oia: ‘E, e hinaaro vau e haere.’ Aita ïa i faataere, ua apee atura ia Eliezera. I to ˈna taeraa i Kanaana, ua faaipoipo atura ia Isaaka.

Ua rave Rebeka i to Iehova hinaaro e ua haamaitaihia, mea na roto hoi to ˈna opu fetii Iesu i fanauhia ˈi tau matahiti i muri aˈe! Ia na reira atoa oe, e oaoa Iehova e e haamaitaihia oe.