Te oaoa nei tatou i te ite i te hoê parau huna

Ua faaite ê na anei te tahi taata ia oe i te hoê parau ta ˈna i ore i faaite ia vetahi ê?—a Mai te peu e e, e parau huna tera no te mea aita te tahi atu taata i ite noa ˈˈe i tera parau. Ua faaite atoa te Bibilia i te hoê “parau aroaro.” E parau huna taa ê tera no te mea no ǒ roa mai i te Atua. Ua tamata te mau melahi i te ite atu â i te reira. E hinaaro atoa anei oe e ite eaha tera parau huna?—

E mea maoro aˈenei, ua poiete te Atua i te tane e te vahine matamua. O Adamu ïa raua Eva. Ua horoa ˈtu te Atua i te hoê nohoraa nehenehe mau, te ô i Edene. Ahiri Adamu e Eva i faaroo i te Atua, ma te turu a ta raua mau tamarii, ua riro atura ïa te fenua taatoa ei paradaiso mai tera ô. Ua ora atoa ïa ratou i roto i te paradaiso e a muri noa ˈtu. Tera râ, te haamanaˈo ra oe i ta Adamu raua Eva i rave?—

Aita te fenua i riro ei paradaiso no te mea ua faaroo ore Adamu e Eva i te Atua. Ua parau râ Iehova e e riro mai te fenua taatoa ei vahi nehenehe, i reira te taata atoa e ora ˈi e a muri noa ˈtu ma te oaoa. E nafea ïa te reira e tupu ai? Na mua ˈˈe, aita te taata i ite. Mea maoro ïa te reira i te riroraa ei parau huna.

I to Iesu haereraa mai i te fenua nei, ua parau oia i te tahi mea no nia i tera parau huna. Ua faaite o ˈna e ua taaihia te reira i te Basileia o te Atua. Ua faaitoito Iesu i te taata ia pure ia tae mai tera Basileia. Na te reira hoi e faariro i te fenua ei paradaiso nehenehe.

Te oaoa ra anei oe i te ite eaha tera parau huna?— A haamanaˈo e o te feia anaˈe e faaroo ia Iehova te ora i roto i te paradaiso. Mea rahi ta te Bibilia faatiaraa no nia i te mau tane e vahine i faaroo ia Iehova. E hinaaro anei oe e ite atu â no nia ia ratou?— E hiˈo anaˈe o vai vetahi e e nafea ia pee i to ratou hiˈoraa.