No te aha e tamau ai i ta oe haapiiraa?

1. Eaha te maitai ia haapii noa oe i te Bibilia?

Eita e ore e ua rahi atu â to oe here ia Iehova maoti teie mau haapiiraa Bibilia tumu. A tamau i te haapii ia puai noa taua here ra. (Petero 1, 2:2) Ia faafatata noa ˈtu â oe i te Atua ma te haapii i ta ˈna Parau e papu ai to oe tiaturiraa e ora e a muri noa ˈtu.—A taio i te Ioane 17:3; Iuda 21.

A ite noa ˈtu â ˈi oe i te Atua, e puai atu â to oe faaroo. E tauturu te faaroo ia oe ia faaoaoa i te Atua. (Hebera 11:1, 6) Ia tatarahapa atoa e ia haamaitai i to oe oraraa.—A taio i te Ohipa 3:19.

2. E nafea vetahi ê e maitai ai maoti to oe ite i te Atua?

Mea papu e e hinaaro oe e faaite ia vetahi ê i ta oe i haapii. E oaoa hoi tatou paatoa i te faaite i te tahi parau apî oaoa. A haapii noa ˈi oe i te Bibilia, e ite oe e nafea ia faaohipa i te Bibilia no te faataa i to oe faaroo ia Iehova e te parau apî oaoa.—A taio i te Roma 10:13-15.

E faaite na mua te rahiraa i te parau apî oaoa i te hoa aore ra te fetii. A paraparau atu ma te mǎrû. A faaite atu i te mau parau fafau a te Atua, eiaha râ e na ô atu e mea hape ta ratou haapaoraa. A haamanaˈo atoa e e pinepine no to oe huru maitai, eiaha no ta oe e parau, e farii mai ai te taata.—A taio i te Timoteo 2, 2:24, 25.

3. Teihea huru auhoaraa e te Atua e nehenehe oe e fanaˈo?

Maoti te haapiiraa i te Bibilia e piri ai oe ia Iehova, a fanaˈo atu ai i te auhoaraa faahiahia roa e o ˈna. E nehenehe mau â oe e riro ei taata no ˈna e ei mero no to ˈna utuafare.—A taio i te Korinetia 2, 6:18.

4. E nafea oe e haere noa ˈi i mua?

E haere â oe i mua ma te tamau i te haapii i te Bibilia. (Hebera 5:13, 14) A ani i te hoê Ite no Iehova ia haapii ia oe i te Bibilia maoti te buka Eaha ta te Bibilia e haapii mai? A ite atu â ˈi oe i te Bibilia, e maitai atu â to oe oraraa.—A taio i te Salamo 1:1-3; 73:27, 28.

No ǒ mai te parau apî oaoa ia Iehova, te Atua oaoa. E piri atu â oe ia ˈna ma te amuimui e to ˈna nunaa. (Hebera 10:24, 25) Ma te tutava noa i te faaoaoa ia Iehova e raea ˈi ia oe te ora mau, te ora mure ore. E faafatata ˈtu i te Atua te ohipa maitai roa ˈˈe ta oe e nehenehe e rave.—A taio i te Timoteo 1, 1:11; 6:19.