E nafea ia faafatata ˈtu i te Atua?

1. E faaroo anei te Atua i te mau pure atoa?

Te ani ra te Atua i te mau huru taata atoa ia faafatata ˈtu ia ˈna i roto i te pure. (Salamo 65:2) Eita râ oia e faaroo aore ra e farii i te mau pure atoa, mai te pure anei a te hoê tane e rave ino i ta ˈna vahine. (Petero 1, 3:7) Aita atoa te Atua i faaroo i te mau pure a Iseraela tei onoono i roto i te ino. E farii râ te Atua i te mau pure a te feia rave hara tei tatarahapa. E fanaˈoraa taa ê mau â te pure.—A taio i te Isaia 1:15; 55:7.

A hiˈo i te video E faaroo anei te Atua i te mau pure atoa?

2. E nafea ia pure?

E tuhaa te pure o ta tatou haamoriraa. Ia pure ïa tatou ia Iehova anaˈe to tatou Atua poiete. (Mataio 4:10; 6:9) No te mea e taata hara tatou, e pure anaˈe ma te iˈoa o Iesu tei pohe hoi no ta tatou mau hara. (Ioane 14:6) Eita Iehova e hinaaro ia faahiti noa tatou i te mau pure papaihia aore ra tamau-aau-hia. Ia pure râ tatou ma to tatou aau.—A taio i te Mataio 6:7; Philipi 4:6, 7.

E faaroo atoa to tatou Atua poiete i te mau pure i roto i te aau. (Samuela 1, 1:12, 13) Te ani maira oia ia pure i te mau taime atoa, i te poipoi anei, i te po, i te taime tamaaraa e ia fifi tatou.—A taio i te Salamo 55:22; Mataio 15:36.

3. No te aha te mau Kerisetiano e putuputu ai?

E ere mea ohie ia faafatata ˈtu i te Atua. Te ora nei hoi tatou i rotopu i te mau taata aita e tiaturi ra ia ˈna e o te tâhitohito ra i ta ˈna parau fafau e tupu te hau i te fenua. (Timoteo 2, 3:1, 4; Petero 2, 3:3, 13) Mea faufaa ïa ia amuimui te mau Kerisetiano e to ratou mau taeae e tuahine no te faaitoito te tahi i te tahi.—A taio i te Hebera 10:24, 25.

Ma te amuimui e te feia e here ra i te Atua e piri atu ai tatou ia ˈna. E taime maitai te mau putuputuraa a te mau Ite no Iehova e faaitoitohia ˈi tatou i te faaroo o vetahi ê.—A taio i te Roma 1:11, 12.

4. E nafea ia faafatata ˈtu i te Atua?

E faafatata ˈtu oe ia Iehova ma te feruri maite i ta oe i haapii i roto i ta ˈna Parau, ta ˈna mau ohipa, aˈoraa e parau fafau. Maoti te pure e te feruri-maite-raa e taa ˈi ia tatou te rahi o te here e te paari o te Atua.—A taio i te Iosua 1:8; Salamo 1:1-3.

Ia tiaturi e ia faatupu oe i te faaroo i te Atua e piri atu ai oe ia ˈna. E nehenehe râ te faaroo e iti mai. A feruri maite ïa i te mau tumu o ta oe mau tiaturiraa ia puai noa taua faaroo ra.—A taio i te Mataio 4:4; Hebera 11:1, 6.

5. Eaha te maitai ia faafatata ˈtu i te Atua?

E aupuru Iehova i te feia e here ia ˈna. E paruru oia ia ratou i te mau mea atâta atoa no to ratou faaroo e tiaturiraa o te ora mure ore. (Salamo 91:1, 2, 7-10) Te faaara maira oia eaha te mau peu e roohia ˈi tatou i te maˈi e te oto. Te haapii maira oia i te huru oraraa maitai roa ˈˈe.—A taio i te Salamo 73:27, 28; Iakobo 4:4, 8.