No te aha i neneihia ˈi te Huriraa o te ao apî?

E rave rahi matahiti to te mau Ite no Iehova faaohiparaa, neneiraa e opereraa e rave rau huriraa o te Bibilia. Ua ite râ matou i muri iho e mea faufaa roa te hoê huriraa apî, o te tauturu i te taata ia “ite papu i te parau mau.” O te hinaaro hoi o te Atua. (Timoteo 1, 2:3, 4) No reira, i te matahiti 1950, ua nenei matou i te tahi tuhaa o te huriraa Beretane o te Huriraa o te ao apî, ta matou Bibilia na roto i te reo o teie tau. Ua hurihia teie Bibilia ma te tano maitai na roto hau atu i te 130 reo, te reo Tahiti atoa.

Mea ohie ia taa. A mairi ai te tau, e taui te reo. E i roto e rave rahi Bibilia, te vai ra te tahi mau parau mea fifi ia taa e aita e faaohipa-faahou-hia ra. Maoti atoa te tahi mau papai tahito aˈe tei itehia mai i taa maitai aˈe ai ia matou na reo Hebera, Arama e Heleni o te Bibilia.

E tuati maitai i te parau a te Atua. Eiaha te feia huri i te Bibilia e taui i te mau papai tei papaihia i raro aˈe i te aratairaa a te varua moˈa o te Atua. Ia pee maite râ i te papai matamua. Teie râ, aita te iˈoa o te Atua ra o Iehova i roto i te rahiraa o te mau huriraa Bibilia.

E faahanahana ia Iehova. (Samuela 2, 23:2) Ua tuuhia te iˈoa Iehova i roto i te Huriraa o te ao apî i te mau vahi e itehia ˈi te reira hau atu i te 7 000 taime i roto i te mau papai Bibilia tahito roa ˈˈe, ia au i te hohoˈa i raro nei. (Salamo 83:18) Maoti te mau maimiraa i rave-maite-hia, mea au roa ia taio i teie Bibilia o te faataa maitai ra i te manaˈo o te Atua. Te faaitoito nei matou ia oe ia haamatau i te taio i te Parau a Iehova i te mau mahana atoa, i roto anei i te Huriraa o te ao apî aore ra te tahi atu mau huriraa Bibilia e vai ra.—Iosua 1:8; Salamo 1:2, 3.

• No te aha matou i faaoti ai e nenei i te hoê huriraa Bibilia apî?

• Ia haamatau te taata e hiaai ra e ite i te hinaaro o te Atua i te aha?