Te haere nei teie ao ihea?

E atutu noa te mau fifi iti rahi e te mau tupuraa riaria e ati aˈe te ao nei i te mau mahana atoa! Eaha te auraa?

PANAˈONAˈO ORE: Paura i paaina i te matete. Orometua haapii e piahi i pupuhihia i te fare haapiiraa. Tamarii rii i haruhia a huri ai te metua i te tua. Vahine e tane ruhiruhia i eiâhia i te ao.

HAAPAORAA: Haapaoraa e turu ra i te mau pǔpǔ patoi i roto i te tamaˈi. Upoo ekalesiatiko i parihia i te haamouraa nunaa. Tia faaroo e mafera ra i te feia apî; haapaoraa e huna ra i te reira. Itiraa o te feia e haere i te pureraa; fare pure i hoohia ˈtu.

HEIPUNI: Uru raau i faaorehia no te ohipa tapihoo. Fenua uru raau i tamâhia e te feia rii ia noaa mai te mori. Pape viivii i raro i te fenua, eita e tano ia inu. Ravaairaa i faainohia e te pehu tapihaa e te tahi mau ravea ravaairaa apî. Mataˈi viivii roa ino.

IMIRAA: Fatata e 480 tara Marite moni ohipa ta te taata taitahi no Afirika i te pae apatoa o te Sahara i te matahiti hoê. Topatari no te nounou o te mau paoti, a ere atu ai tau tausani taata i te ohipa. Ereraa te feia tuu moni i ta ratou faufaa haaputu no te ohipa taviri.

OˈE: I te ao nei, fatata e 800 000 000 taata o te poia tamau nei.

TAMAˈI: Hau atu i te 100 000 000 taata tei pohe no te tamaˈi i te senekele 20. Mauhaa tamaˈi atomi e navai no te haamou i te taata atoa e rave rahi taime. Tamaˈi tivira. Te parare ra te ohipa totoaraa i te fenua atoa.

MAˈI PARARE E TE TAHI ATU: Mai te matahiti 1918 atu, ua haapohe te fiva Paniora e 21 000 000 taata. O te heˈa mate (SIDA) i teie nei “te maˈi parare rahi ino roa ˈˈe i roto i te tuatapaparaa o te taata.” Te faatupu ra te mariri ai taata e te maˈi mafatu i te oto i te ao nei.

Eiaha e hiˈo i te parau apî taitahi. E tupuraa otahi anei tera? Aore ra e tuhaa rau anei o te hoê tupuraa rahi e auraa mau to te reira?

[Tumu parau tarenihia/Hohoˈa i te api 5]

Te tâuˈa mau ra anei te Atua?

No te hepohepo i te mau tupuraa riaria aore ra te ere-roa-raa i te tahi mea aore ra i te hoê taata, mea rahi te taata e ui ra no te aha te Atua e ore ai e arai mai.

Te tâuˈa ra te Atua. Te horoa mai nei oia i te aratairaa papu e te tamǎrûraa mau. (Mataio 11:28-30; Timoteo 2, 3:16, 17) Ua faanaho oia e faaore roa i te haavîraa uˈana, te maˈi, e te pohe. E tapao faaite ïa e te tâuˈa ra oia eiaha noa i te feia o te hoê nunaa, o te mau nunaa, opu fetii, e reo atoa râ.—Ohipa 10:34, 35.

E o tatou? Ua ite anei outou o vai te Atua Poiete i te raˈi e te fenua? O vai to ˈna iˈoa? Eaha ta ˈna opuaraa? Te pahono ra oia i teie mau uiraa i roto i te Bibilia. Te faaite mai ra oia eaha te mau mea ta ˈna e rave nei no te faaore i te haavîraa uˈana, tae noa ˈtu i te maˈi e te pohe. Ia aha ïa tatou no te fanaˈo atu? Ia haapii ïa no nia ia ˈna e ta ˈna opuaraa, e tia ˈi. E nafea hoi tatou e faufaahia ˈi i ta ˈna mau faanahoraa mai te peu e eita tatou e tiaturi ia ˈna? (Ioane 3:16; Hebera 11:6) E titau-atoa-hia ia auraro i ta ˈna mau faaueraa. (Ioane 1, 5:3) E hinaaro anei outou?

No te taa i te tumu i faatia ˈi te Atua i teie nei mau tupuraa, e mea tia ia taa ia tatou te hoê parau faufaa roa. Te tatara ra te Bibilia i te reira. I te api 15 o teie buka rairai, e ite outou eaha taua parau ra.