E ora te mau hoa o te Atua i roto i te paradaiso

E ere te paradaiso mai te ao ta tatou e ora nei. Aita roa te Atua i hinaaro e ia î te fenua i te ati e te oto, te mamae e te mauiui. A muri aˈe, e faariro te Atua i te fenua ei paradaiso. Mai te aha te huru o te paradaiso? E hiˈo ïa tatou i ta te Bibilia e parau ra:

E feia maitatai. E riro te paradaiso ei nohoraa no te mau hoa o te Atua. E hamani maitai ratou te tahi i te tahi. E ora ratou ia au i te mau eˈa tia o te Atua.—Maseli 2:21.

E navai roa te maa. I roto i te paradaiso, aore e pohe poia faahou. Te na ô ra te Bibilia e: “E riro hoi e maa sitona [aore ra maa] tei te fenua.”—Salamo 72:16.

E fare nehenehe e e ohipa maitai mau. I te fenua tei riro ei paradaiso, e fare ïa to te utuafare tataitahi. E rave te taata atoa i te ohipa o te faaoaoa mau.—Isaia 65:21-23.

E hau e ati aˈe te ao nei. Eita te taata e aro e e pohe faahou i te tamaˈi. Te na ô ra te Parau a te Atua e: “Ua faaore [te Atua] i te tamaˈi.”—Salamo 46:8, 9.

E ea maitai. Te fafau ra te Bibilia e: “E ore hoi to reira [e ora ra i roto i te paradaiso] e parau e, Ua paruparu vau i te maˈi.” (Isaia 33:24) Aore roa atoa e feia pirioi, matapo, tariˈa turi aore ra vava faahou.—Isaia 35:5, 6.

E hope te mauiui, te oto e te pohe. Te na ô ra te Parau a te Atua e: “E ore roa te pohe, e ore atoa te oto e te auê e te mauiui. Ua mou hoi te mau mea tahito.”—Apokalupo 21:4.

E mou te feia iino. Te fafau ra Iehova e: “E tâpû-ê-hia . . . te paieti ore i te fenua nei, e te feia i rave i te hara ra, e taihitumuhia ïa.”—Maseli 2:22.

E here e e faatura te taata te tahi i te tahi. Aita e parau-tia ore, e haavîraa, e nounou, e e riri rahi faahou. E tahoê te taata e e ora ratou ia au i te mau eˈa tia o te Atua.—Isaia 26:9.