Nafea oe e haapii ai no nia i te Atua?

E nehenehe oe e haapii no nia ia Iehova ma te taio i te Bibilia. I mutaa ihora, ua maiti te Atua i te tahi mau taata no te papai i to ˈna mau manaˈo. E parauhia teie mau papai, te Bibilia. I teie mahana, e haapii tatou no nia i te Atua ma te taio i te Bibilia. No te mea tei roto i te Bibilia ta Iehova parau aore ra poroi, e parau-atoa-hia ïa te reira, te Parau a te Atua. E nehenehe tatou e tiaturi i ta te Bibilia e parau ra no te mea eita roa Iehova e haavare. “E ore . . . e tia i te Atua ia haavare.” (Hebera 6:18) Tei roto i te Parau a te Atua te parau mau.—Ioane 17:17.

O te Bibilia te ô faufaa roa ˈˈe a te Atua no tatou. E au te reira i te hoê rata a te hoê metua tane î i te here na ta ˈna mau tamarii. Te faaite mai ra te reira i te parau fafau a te Atua e faariro i te fenua ei vahi faahiahia no te ora, ei paradaiso. Te faaite atoa mai ra te reira eaha ta ˈna i rave i tahito ra, eaha ta ˈna e rave nei e eaha ta ˈna e rave a muri aˈe no ta ˈna mau tamarii haapao maitai. E tauturu atoa mai te reira ia faaafaro i to tatou mau fifi e ia oaoa tatou.—Timoteo 2, 3:16, 17.

E mau hoa no te Atua te mau Ite no Iehova, e tauturu atu ratou ia oe ia taa i ta te Bibilia e haapii ra. A faaite atu ia ratou e te hinaaro nei oe e haapii i te Bibilia. Eita ratou e titau i te moni. (Mataio 10:8) Hau atu â, e nehenehe oe e haere atu i te mau putuputuraa Kerisetiano. E tupu te reira i te mau vahi haamoriraa, parauhia Piha a te Basileia. Ia apiti oe i te mau putuputuraa Kerisetiano, e rahi oioi mai ïa to oe ite no nia i te Atua.

E nehenehe oe e haapii no nia i te Atua na roto i te mau mea ta ˈna i hamani. Ei hiˈoraa, te na ô ra te Bibilia: “Hamani ihora te Atua i te raˈi e te fenua.” (Genese 1:1) I to Iehova poieteraa i “te raˈi,” ua hamani oia i te mahana. Eaha ta te reira e haapii mai ra no nia i te Atua? Te faaite mai ra ïa e e mana rahi to Iehova. O ˈna anaˈe te tia ia hamani i te hoê mea puai mai te mahana ra. Te faaite atoa mai ra e e Atua paari o Iehova no te mea e titauhia te aravihi no te hamani i te mahana, o te tamahanahana, o te turama e o te ore roa e pau.

Te faaite ra ta Iehova poieteraa e te here ra oia ia tatou. A feruri na i te mau maa hotu e rave rau o te fenua. E nehenehe hoi Iehova e horoa mai i te hoê noa huru maa hotu aore ra aita roa ˈtu. Ua horoa mai râ Iehova e rave rahi huru maa hotu e ua rau te hohoˈa, te faito, te û e te au. Te faaite mai ra te reira e e ere noa Iehova i te hoê Atua î i te here, e Atua horoa noa atoa râ e te maitai e te mǎrû.—Salamo 104:24.