Te titau manihini nei te Atua ia riro oe ei hoa no ˈna

Te hinaaro nei te Atua ia riro oe ei hoa no ˈna. Ua manaˈo aˈena anei oe e e nehenehe oe e riro ei hoa no Tei rahi roa ˈˈe i te ao taatoa nei? Ua parauhia o Aberahama, tei ora i tahito ra, e hoa oia no te Atua. (Iakobo 2:23) Ua fanaˈo atoa te tahi mau taata i faahitihia i roto i te Bibilia i te auhoaraa e te Atua e ua haamaitai-rahi-hia ratou. I teie mahana, ua riro te taata no te mau vahi atoa o te fenua ei hoa no te Atua. E nehenehe atoa oe e riro ei hoa no te Atua.

Te riroraa ei hoa no te Atua, mea maitai aˈe ïa i te riroraa ei hoa no te tahi noa ˈˈe taata. Eita roa te Atua e rave i te tahi mea e inoino ai to ˈna mau hoa tei tia te aau. (Salamo 18:25) Te riroraa ei hoa o te Atua, mea maitai aˈe ïa i te monihia. Ia pohe te hoê taata moni, na vetahi ê ïa ta ˈna moni. E taoˈa rahi râ ta tei fanaˈo i te auhoaraa e te Atua te ore roa e eiâhia.—Mataio 6:19.

E tamata paha vetahi i te tapea ia oe i te haapii no nia i te Atua. E na reira atoa paha vetahi o to oe mau hoa e fetii. (Mataio 10:36, 37) Ia faaooohia oe aore ra ia faariariahia oe, a uiui na ia oe iho, ‘O vai ta ˈu e hinaaro ra e faaoaoa, te taata anei aore ra te Atua?’ A feruri na i te reira: Ahiri e e parau atu te hoê taata ia faaea i te tamaa, e faaroo anei oe ia ˈna? Eita roa ïa! Mea faufaa te maa no te ora. E nehenehe râ te Atua e horoa ˈtu i te ora no oe e a muri noa ˈtu! Eiaha roa ˈtu ïa oe e vaiiho i te hoê noa ˈˈe taata ia tapea ia oe i te haapii nafea oe e riro ai ei hoa no te Atua.—Ioane 17:3.