Pene 71

Te tamau noa ra te mau Pharisea i te ore e tiaturi

TE PEAPEA nei te mau metua o te taata taparu o tei matapo na, i to raua tiiraahia e aratai mai i mua i te mau Pharisea. Ua ite raua e ua faaotihia e e hurihia te taata e faaite noa ˈtu i te faaroo ia Iesu i rapae i te sunago. E mea fifi mau hoi ia tâpûhia i te tahi mau melo o te amuiraa, no te hoê utuafare fetii veve iho â râ. No reira, ua haapao maitai te mau metua i ta raua parau.

Ua ui maira te mau Pharisea ia raua e: “O ta orua tamaiti teie i parau ra e, i fanau matapo mai oia, eaha hoi oia i ite ai i teie nei?”

Ua parau maira na metua no ˈna ra ia ratou e: “Ua ite mâua, na mâua mau teie nei tamaiti, e matapo mau oia mai te fanauraa mai â. Area râ te mea i ite ai oia i teie nei, aore ïa mâua i ite; e tei faaora hoi i tana mata aore atoa ïa mâua i ite.” E mea papu e ua faaite atu ta raua tamaiti ia raua i te huru tupuraa, eita râ raua e hinaaro e faarahi i te parau. Ua na ô noa ˈtura raua ia ratou e: “A ui atu na ia ˈna, ua paari hoi oia iho, e na ˈna iho e parau mai.”

Ua tii faahou atura te mau Pharisea i taua taata ra e i te reira taime ua tamata ˈtura ratou i te faariaria ia ˈna na roto i te parauraa ˈtu e ua noaa ia ratou te tahi mau parau te nehenehe e haafifi ia Iesu. Ua parau faahou atura ratou i te taata matapo ra e: “E haamaitai i te Atua; ua ite hoi matou e, e taata hara teie nei taata.”

Ua parau maira oia, ma te ore e patoi i ta ratou pariraa, na ô maira e: “Aore au i ite e, e taata hara oia.” Teie râ, te parau faahou nei oia e: “Hoê roa a ˈu parau i ite, e matapo to ˈu i mutaa iho, e teie nei te ite nei au.”

Ma te tamata i te imi i te hoê haafifiraa no ˈna na roto i ta ˈna mau parau, ua ui faahou maira te mau Pharisea ia ˈna e: “I aha mai oia ia oe? i nahea oia i te faaoraraa i to mata na?”

Ua parau maira oia ia ratou e: “Ua faˈi atu hoi au ia outou, aore outou i faaroo: eaha ra hoi outou i hinaaro faahou ai i te faaroo?” E ma te hinaaro hoi e faaooo ia ratou, ua na ô atura oia ia ratou e: “Ei pǐpǐ anei outou atoa na ˈna?”

Ua riro te reira i te faahae i te mau Pharisea, ua faaino atura ratou ia ˈna i te na ôraa e: “O oe ta ˈna pǐpǐ, area matou e pǐpǐ ïa na Mose. Ua ite matou e, ua parau mai te Atua ia Mose; area teie nei taata, aore matou i ite i te vahi no reira mai oia ra.”

Ma te ore e huna i to ˈna maere rahi, ua na ô maira taua taata ani noa ra ma te haehaa e: “E mea huru ê hoi tena aore outou i ite i te vahi no reira mai oia, e inaha, ua faaora hoi oia i tau mata nei.” Eaha ïa te faaotiraa e nehenehe e huti mai mai roto mai i taua mau parau ra? Ua haamanaˈo atura taua taata ra i te hoê ture matau-maitai-hia, ua parau atura ia ratou e: “Ua ite hoi tatou e, e ore te Atua e faaroo i te feia hara, o te taata râ e haamori i te Atua, e o tei haapao i to ˈna ra hinaaro, o ta ˈna ïa e faaroo. Aore i itea te matapo fanau nei i te oraraa i te taata mai te matamua mai â o te fenua nei.” Teie atura te faaotiraa e rave mai: “Ahiri teie nei taata e ere i to ǒ i te Atua ra, eita roa ta ˈna ravea e tia.”

Ua mamû noa ihora te mau Pharisea i mua i teie feruriraa papu e te tano maitai. Aita hoi ratou i hinaaro e farii i te parau mau, ua faaino atura ratou i taua taata ra, na roto i te parauraa e: “I fanau mai oe ma te hara, e haapii mai hoi oe ia matou?” Ua tuu atura ratou ia ˈna i rapae au i te sunago ra.

I to Iesu iteraa i te ohipa ta ratou i rave, ua haere atura oia e farerei i te taata ta ˈna i faaora e ua parau atura ia ˈna e: “Ua faaroo oe i te Tamaiti a te Atua?”

Ua parau maira te taata ani noa i te taoˈa ra e: “E te Fatu, o vai oia ia faaroo atu vau ia ˈna?”

Ua parau atura Iesu ia ˈna e: “Ua hiˈo hoi oe ia ˈna, e oia hoi teie e parau atu ia oe nei.”

I te reira iho taime, ua tipapa ihora taua taata ra i mua i te aro o Iesu e na ô maira e: “E te Fatu, ua faaroo vau.”

I reira, ua faataa maira Iesu ia ˈna e: “I haere mai nei au i te ao nei ia tupu te parau-tia, ia ite te feia ite ore ra, e ia riro te feia ite ra ei matapo.”

Ua faaroo maira râ te mau Pharisea i reira atoa iho i taua parau ra, e ua parau maira ia ˈna e: “E matapo atoa anei matou nei?” Mai te peu e te farii ra ratou e ua vai matapo noa ratou i mutaa ihora i te pae o te feruriraa, e paruru ïa te reira i ta ratou faahaparaa ia Iesu. O ta Iesu ïa i parau atu ia ratou e: “Ahiri outou e matapo ra, aita a outou hara.” Teie râ, te faˈi papu nei ratou e e ere ratou i te matapo, e eita hoi ratou e hiaai i te maramarama i te pae varua. No reira ˈtura Iesu i parau ai e: “Te parau mai na râ outou e, Ua ite matou, te vai na ïa ta outou hara.” Ioane 9:19-41.

▪ No te aha te mau metua o te taata taparu i matapo na, i mǎtaˈu ai i to raua aratairaahia i mua i te mau Pharisea e mea nafea to raua pahonoraa ma te ara i ta raua parau?

▪ Mea nafea te mau Pharisea i te tamataraa i te haafifi i te taata i matapo na?

▪ Eaha te parau haaferuriraa papu ta taua taata ra i rave o tei faariri i te mau Pharisea?

▪ No te aha aita ta te mau Pharisea e ravea paruru noa ˈˈe i ta ratou faahaparaa ia Iesu?