Pene 70

Ua faaora o Iesu i te hoê taata matapo mai te fanauraa mai â

A TAMATA ˈI te mau ati Iuda i te pehi ia ˈna i te ofai, aita Iesu i faarue i te oire no Ierusalema. Ma te hahaere na roto i te oire i te mahana sabati, ua ite atura ta ˈna mau pǐpǐ e o ˈna iho i te hoê taata matapo mai te fanauraa mai â. Ua ui maira ta ˈna mau pǐpǐ ia ˈna: “E Rabi, na vai te hara, na ˈna iho anei, e na na metua anei, i fanau matapo mai ai oia?”

Peneiaˈe, te tiaturi nei te mau pǐpǐ mai te tahi atoa mau rabi e, e nehenehe te hoê taata e hara, noa ˈtu â ïa tei roto noâ oia i te opu o to ˈna ra metua vahine. Ua pahono maira Iesu ia ratou e: “E ere i to te hara a teie nei taata e te hara a na metua ra, no te mea râ ia itea te ohipa a te Atua ia ˈna nei.” E ere te maˈi matapo o taua taata ra no roto mai i te hoê hape ravehia e ana aore ra e to ˈna mau metua. Na te hara râ a te taata matamua ra o Adamu i faariro i te taata ei feia hara, e mai reira mai, ua roohia ratou i te mau maˈi mai teie matapo mai te fanauraa mai â ta Iesu e faaohipa no te faaite i te mau ohipa a te Atua.

Te faaite nei Iesu i te faufaaraa ia rave i taua mau ohipa ra ma te ore e haamarirau. Ua parau oia e: “E rave au i te ohipa a tei tono mai ia ˈu nei ra, oi vai aˈe i te ao; te fatata mai nei hoi te rui, aore roa e taata e ohipa i reira. Te parahi nei au i te ao nei, o vau te maramarama o teie nei ao.” Fatata hoi te taime e pohe ai Iesu e e tuuhia ˈi oia i roto i te hoê menema pouri mau, e i reira, eita oia e ohipa faahou. I teie nei râ taime, te haamaramarama nei oia i to te ao.

I muri aˈe i to Iesu faahitiraa i taua mau parau ra, ua tufa ihora oia i te huare i raro i te repo, ua oˈi ihora i to ˈna huare i te repo. Ua parai atura i te repo i te mata o taua taata matapo ra, e ua parau atura ia ˈna e: “A haere, a horoi i to mata i te pape ra i Siloama.” Ua haere atura oia, horoi ihora e ua haere maira ma te ite no te taime matamua o to ˈna oraraa. Auê hoi te rahi o to ˈna oaoa i nia i te eˈatia e!

Ua maere rahi hoi te feia tapiri mai ia ˈna e te feia atoa ta ˈna i matau. Ua uiui noa ihora ratou ratou iho e: “E ere anei teie i te taata i parahi noa ani ai i te taoˈa ra?” Ua pahono maira vetahi pae e: “Oia hoi teie.” Aita râ vetahi i tiaturi i te reira e ua parau maira ratou e: “Mai ia ˈna mau nei â hoi te huru.” Ua parau maira taua taata iho ra e: “O vau hoi ïa.”

Ua ui atura te mau taata ia ˈna e: ‘Mea nafea to mata i araara ˈi?’

Ua parau maira oia, na ô maira e: “I oˈihia te repo e te hoê taata o Iesu te iˈoa, e ua parai maira i tau mata, e na ô maira ia ˈu, A haere i te pape ra i Siloama horoi ai i to mata, haere atura hoi au horoi ihora, e ite atura.”

Ua ui atura ratou ia ˈna e: “Teihea taua taata ra?”

Ua parau maira oia e: “Aore au i ite.”

Ua aratai atura ratou i te taata i matapo na i mua i te mau raatira haapaoraa, te mau Pharisea ra. Ua uiui atoa mai ratou ia ˈna mea nafea oia i ite ai. Ua faataa maira oia, na ô maira e: “I parai mai oia i te repo i tau mata; e horoi ihora hoi au, e te ite nei au.”

E tia mau hoi i te mau raatira haapaoraa ia oaoa e te taata taparu matapo ra! Aita râ ratou i na reira, ua faahapa râ ratou ia Iesu. Ua na ô maira ratou: “E ere teie taata i to te Atua.” No te aha hoi taua haapapuraa ra? “Aore hoi oia i haapao i te sabati.” Teie râ, ua na ô aˈera te hoê pae o taua mau Pharisea ra e: “Eaha e tia ˈi i te taata hara ia rave i te tapao mai teie nei?” E ua amaha ihora ratou.

Ua ui faahou maira ratou i taua taata matapo ra e: “Eaha ta oe na parau ia ˈna, oia i faaora i to mata na?”

Ua pahono atura o ˈna e: “E peropheta ïa oia.”

Te patoi nei râ te mau Pharisea i te faaroo ia ˈna. Ua tiaturi papu ratou e e ohipa huna teie i rotopu ia Iesu e taua taata ra no te faahape i te feruriraa o te nunaa. No te haamaramarama i taua ohipa ra, ua tii aˈera ratou i na metua o taua taata i faaorahia ra no te uiui atu ia raua. Ioane 8:59; 9:1-18.

▪ No te aha taua taata ra i matapo ai, e ere râ no teihea tumu?

▪ Eaha te rui i reira te hoê taata e ore ai e nehenehe e rave i te ohipa?

▪ Eaha te huru o te feia i matau i taua taata ra a ite ai ratou e ua ora oia?

▪ No te aha te mau Pharisea i amaha ˈi i muri aˈe i te oraraa te maˈi o taua taata ra?