Pene 47

Mai te mau roimata e tae atu i te oaoaraa rahi

I TO ˈNA iteraa e ua ora te vahine i roohia i te tapahi, ua rahi roa ˈtu â te tiaturi o Iaeiro i te mana semeio o Iesu. Na mua noa ˈˈe, ua ani oia ia Iesu ia rave i te tahi ohipa na ta ˈna tamahine herehia e 12 matahiti, tei fatata roa i te pohe. Tera râ, ua tupu te ohipa i taiâhia e Iaeiro. A paraparau noa ˈi Iesu i taua vahine nei, ua haere maira te tahi feia e ua parau mǎrû maira ia Iaeiro e: “Ua pohe roa to tamahine, eaha oe i haapeapea ˈtu ai â i te orometua?”

Auê hoi parau mauiui mau e! A feruri na: Ua paruparu roa ïa taua taata nei, tei faatura-rahi-hia i roto i to ˈna oire, i te faarooraa e ua pohe ta ˈna tamahine. Ua faaroo râ o Iesu i te paraparauraa. Fariu ihora oia ia Iaeiro ra e ua na ô atura ma te faaitoito e: “Eiaha e mǎtaˈu; e faaroo noa mai.”

Ua apee ihora o Iesu i teie taata i peapea roa i to ˈna ra fare. I to raua taeraa ˈtu, ua ite aˈera raua i te arepurepuraa rahi o te mau auê e te oto. Te mihi noa ra te feia i putuputu mai i reira. I to ˈna tomoraa ˈtu i roto i te fare, ua ani aˈera o Iesu e: “Eaha outou i auê noa ˈi e i oto ai hoi? aore taua potii nei i pohe, ua taoto râ.”

I to ratou faarooraa i taua parau ra, ua tâhito maira te mau taata ia Iesu; ua ite hoi ratou e ua pohe mau â taua potii nei. Tera râ, ua haapapu ihora Iesu e te taoto noa ra oia. Na roto i te mana no ǒ mai i te Atua ra, e faaite oia e e nehenehe te taata e faatia-faahou-hia mai mai te pohe mai, mai te taata e faaarahia mai roto mai i te taoto hohonu.

Ua tuu atura Iesu i te mau taata atoa i rapae, maoti râ o Petero, o Iakobo, o Ioane e te metua tane e te metua vahine o te potii i pohe ra. Ua tapiri atura Iesu e na taata e pae ra i pihai iho i te tamahine e tarava noa ra. Ma te rave mai i to ˈna rima, ua parau atura Iesu e: “Talita kumi,” oia hoi te auraa ia tatarahia, “E teie nei potii, a tia i nia, te faaue atu nei au ia oe.” I reira iho, ua tia maira taua potii ra i nia e ua hahaere ihora! I mua i taua semeio ra, ua maere roa ˈˈera to ˈna mau metua e ua î roa ˈˈera i te oaoa rahi.

I muri aˈe i to ˈna faaueraa e ia hopoihia mai i te maa na taua tamarii ra, ua aˈo aˈera o Iesu ia Iaeiro e i ta ˈna vahine eiaha roa e faaite i te taata i te ohipa i tupu. Noa ˈtu râ te mau aˈoraa a Iesu, ua parare te parau apî na roto i te mataeinaa atoa. Teie te piti o te faatia-faahou-raa ta Iesu i faatupu. Mataio 9:18-26; Mareko 5:35-43; Luka 8:41-56.

▪ Eaha te parau apî tei faataehia ˈtu ia Iaeiro ra, e mea nafea to Iesu faaitoitoraa ˈtu ia ˈna?

▪ I to raua tapaeraa ˈtu i te fare o Iaeiro, eaha ïa te ohipa e tupu ra?

▪ No te aha Iesu i parau ai e te taoto noa ra te tamahine i pohe ra?

▪ O vai na feia e pae tei ite i taua faatia-faahou-raa ra?