Pene 36
Te faaroo rahi o te hoê raatira faehau
A FAAHITI ai Iesu i ta ˈna Aˈoraa i nia i te Mouˈa, ua fatata roa oia i te afaraa o ta ˈna taviniraa. Te auraa ra, te toe noa ra ïa hoê matahiti e e iva avae no te faaoti i ta ˈna ohipa i nia i te fenua nei.
Te tomo ra o Iesu i teie nei i roto i te oire no Kaperenaumi, te tahi vahi haapuraa no ta ˈna taviniraa. Inaha, ua haere maira te mau matahiapo o te mau ati Iuda ia ˈna ra e ani i te tahi ohipa. Mea tonohia mai ratou na te hoê raatira o te nuu roma, e Etene oia, oia hoi te hoê taata no roto i te hoê nunaa ê atu i te ati Iuda.
Fatata roa ta ˈna tavini, mea here-roa-hia e ana, i te pohe i te hoê maˈi rahi, e te hinaaro ra oia e ia faaora o Iesu ia ˈna. Ua taparu atura te mau ati Iuda ia Iesu ma te tuutuu ore no taua raatira nei e ua na ô atura: “E taata au teie ia hamani maitai atu oe, e aroha hoi oia i to tatou nunaa e na ˈna i faatia i to matou sunago.”
Ua pee atura Iesu ia ratou ma te ore e haamarirau. Teie râ, a fatata noa ˈtu ai ratou, ua tono atura te raatira o te nuu i te tahi mau hoa e parau atu ia ˈna e: “E te Fatu, eiaha a haarahi oe, eita hoi au e au ia tomo mai oe i roto i tau fare: i ore ai hoi au i manaˈo ai e, e au vau ia haere atu i mua i to aro na.”
Auê hoi taua raatira i te haehaa e, oia tei matau i te horoa i te mau faaueraa! Eita e ore e te manaˈo atoa ra oia ia Iesu, ma te ite maitai i te peu e opani ra i te mau ati Iuda ia amuimui noa ˈtu i roto i te mau taata e ere i te ati Iuda. O Petero iho hoi tei parau e: “Ua ite hoi outou e, e ore te taata ati Iuda e amui atu, e e ore hoi e tomo i te fare o te taata o te hoê fenua ê ra.”
Eita e ore e no to ˈna hinaaro ia ore o Iesu ia roohia i te fifi na roto i te ofatiraa i taua peu ra, ua tono atura te raatira i to ˈna mau hoa e ani atu ia ˈna e: “E parau noa mai râ oe i te parau, e ora ïa tau tavini. O vau atoa nei hoi, o raro aˈe ia vetahi ê, e faehau ra to raro aˈe ia ˈu, ia parau vau i te hoê, A haere, ua haere ïa; ia parau hoi i te tahi, A haere mai! ua haere mai ïa; e ia parau hoi i tau tavini, A na ô! ua na reira ïa.”
E ia faaroo atu Iesu i te reira, ua maere roa ˈˈera oia. Ua parau atura oia e: “Oia mau, ta ˈu e parau atu ia outou nei, aitâ vau i ite i teie faaroo i te rahi i Iseraela atoa nei.” I muri aˈe i to ˈna faaoraraa i te tavini o te raatira, ua faaite atoa ˈtura Iesu e mea nafea e noaa ˈi i te mau taata e ere i te ati Iuda faaroo i te mau haamaitairaa ta te mau ati Iuda faaroo ore e patoi ra.
“E rave rahi,” ta Iesu ïa i parau, “te haere mai mai te hitia o te râ e te tooa o te râ, e haaparahi-atoa-hia ratou e o Aberahama, o Isaaka, e o Iakoba i te amuraa maa i te basileia ra o te [raˈi]. Area te tamarii o te basileia ra, e hurihia ïa i roto i te pouri i vaho ra, tei reira te oto e te auauraa niho.”
“Te tamarii o te basileia, e hurihia i roto i te pouri i vaho” o te mau ati Iuda ïa i te pae tino tei ore i farii i te titauraa i horoa-na-mua-hia ia ratou ra, no te faatere atu i pihai iho i te Mesia. O Aberahama, o Isaaka, e o Iakoba, o ratou ïa te faahohoˈa ra i te faanahoraa o te Basileia o te Atua. Te faaite ra ïa Iesu e mea nafea te mau Etene, ei auraa parau, e fariihia ˈi i te amuraa maa i te raˈi ra, ‘i roto i te basileia o te raˈi.’ Luka 7:1-10; Mataio 8:5-13; Ohipa 10:28.
▪ No te aha te mau ati Iuda e faatae ai i te tahi aniraa no te hoê raatira o te nuu Etene?
▪ No te aha paha aita te raatira i ani atu ia Iesu ia tomo mai i roto i to ˈna fare?
▪ Eaha ta Iesu e hinaaro ra e parau na roto i ta ˈna mau parau faaotiraa?