Iesu, to ˈna oraraa e ta ˈna taviniraa

Te faaroo rahi o te hoê raatira

A FAAHITI ai Iesu i ta ˈna Aˈoraa i nia i te mouˈa, ua fatata roa oia i te afaraa o ta ˈna taviniraa. Te auraa ra, te toe ra ïa hoê matahiti e e iva avae no te faaoti i ta ˈna ohipa i nia i te fenua nei.

Te tomo ra o Iesu i teie nei i roto i te oire no Kaperenaumi, i reira hoi to ˈna faanahoraa i ta ˈna taviniraa. Inaha, ua haere maira te mau matahiapo o te mau ati Iuda ia ˈna ra e ani i te tahi ohipa. Mea tonohia mai ratou na te hoê raatira o te nuu roma, te hoê taata no roto i te mau Etene aore ra e ere i te ati Iuda.

Fatata roa ta ˈna tavini, mea here-roa-hia hoi e ana, i te pohe i te hoê maˈi rahi, e te hinaaro ra oia e ia faaora o Iesu ia ˈna. Ua taparu atura te mau ati Iuda ia Iesu ma te tuutuu ore, e ia haere mai iho â oia e hiˈo i te raatira: “E taata au teie ia hamani maitai atu oe, ta ratou ïa i parau atu, e aroha hoi oia i to tatou nunaa e na ˈna i faatia i to matou sunago.”

Ua pee atura Iesu ia ratou ma te ore e haamarirau. Teie râ, a fatata noa ˈtu ai ratou, ua tono atura te raatira i te tahi mau hoa e parau atu ia ˈna e: “E te Fatu, eiaha a haa rahi oe, eita hoi e au ia tomo mai oe i roto i tau fare: i ore ai hoi au i manaˈo ai e, e au vau ia haere atu i mua i to aro na.”

Auê hoi taua raatira i te haehaa e, oia tei matau i te horoa i te mau faaueraa! Eita e ore e te manaˈo atoa ra oia ia Iesu, ma te papu maitai i te peu e opani ra i te mau ati Iuda e ore roa ˈtu e amuimui atu i roto i te mau taata e ere i te ati Iuda. O Petero iho hoi tei parau e: “Ua ite hoi outou e, e ore te taata ati Iuda e amui atu, e e ore hoi e tomo i te fare o te taata o te hoê fenua ê ra.”

Eita e ore no to ˈna hinaaro e ia ore o Iesu e ofati i taua peu ra, e ia ore oia e roohia i te tahi mau faahopearaa au ore, ua tono atura te raatira i to ˈna mau hoa e ani atu ia ˈna e: “E parau noa mai râ oe i te parau, e ora ïa tau tavini. O vau atoa nei hoi, o raro aˈe ia vetahi ê, te faehau ra to raro aˈe ia ˈu, ia parau vau i te hoê A haere, ua haere ïa; ia parau hoi i te tahi, A haere mai, ua haere mai ïa; e ia parau hoi i tau tavini, A na ô, ua na reira ïa.”

E ia faaroo atu Iesu i te reira, ua maere roa aˈera oia. “Oia mau, ta ˈu e parau atu ia outou nei, ta ˈna ïa i parau, aitâ vau i ite i teie faaroo i te rahi i Iseraela atoa nei.” I muri aˈe i to ˈna faaoraraa i te tavini o te raatira, ua faaite atoa ˈtura Iesu e e noaa i te mau taata e ere i te ati Iuda, e e faaroo hoi to ratou, i te mau haamaitairaa ta te mau ati Iuda faaroo ore e patoi ra.

“E rave rahi, ta Iesu ïa i parau, te haere mai mai te hitia o te râ e te tooa o te râ e haaparahi-atoa-hia ratou e o Aberahama, o Isaaka, e o Iakoba i te amuraa maa i te basileia ra o te ao. Area te tamarii o te basileia ra, e hurihia ïa i roto i te pouri i vaho ra, tei reira te oto e te auauraa niho.”

“Te tamarii o te basileia, e hurihia i roto i te pouri i vaho” o te mau ati Iuda ïa i te pae tino tei ore i farii i te titauraa i horoa-na-mua-hia ia ratou ra, no te faatere atu i pihai iho i te Mesia. O Aberahama, o Isaaka e o Iakoba, o ratou ïa te faahohoˈa ra i te Basileia o te Atua. Te faaite maira ïa Iesu e e fariihia te mau Etene, ei auraa parau, i te amuraa maa i te raˈi ra, “i roto i te basileia o te ao”. Luka 7:1-10; Mataio 8:5-13; Ohipa 10:28.

◆ No te aha te mau ati Iuda i taparu atu ai ia Iesu ia hamani maitai mai oia i te hoê raatira no roto i te nunaa Etene?

◆ Eaha te mau tumu e nehenehe e faahitihia no reira te raatira i ani atu ai ia Iesu eiaha e tomo mai i roto i to ˈna fare?

◆ Eaha ta Iesu e hinaaro ra e parau i roto i ta ˈna mau parau faaotiraa?