TE HOÊ AO AREPUREPU

4 | A haapuai i ta oe tiaturiraa no a muri aˈe

NO TE AHA MEA FAUFAA?

No te ahoaho ta te arepurepu o teie ao e faatupu ra, te fifihia ra te taata i te pae tino e i te pae o te huru aau. No e rave rahi o te faaruru ra i te mau tupuraa fifi mau, eita te oraraa e maitai mai. Eaha ïa to ratou huru?

Aita vetahi e hinaaro faahou e feruri i te a muri aˈe.
E inu vetahi i te ava e e rave ratou i te raau taero no te ape i to ratou mau fifi.
E manaˈo te tahi atu e mea faufaa ore ia ora, a feruri atu ai i te haapoheraa ia ratou iho.

Eaha te titauhia ia ite?

Te vai ra paha te tahi mau fifi ta oe e faaruru no te hoê taime poto, a maitai mai ai to oe oraraa ma te manaˈo-ore-hia.
Noa ˈtu eita to oe oraraa e maitai mai, e ravea ta oe no te faaoromai i to oe mau fifi.
Te horoa mai ra te Bibilia i te hoê tiaturiraa papu, oia hoi te ravea mure ore no te mau fifi atoa o te huitaata.

Eaha te nehenehe e rave i teie nei?

Te parau ra te Bibilia: “Eiaha roa ïa e haapeapea no ananahi, no te mea e haapeapearaa ê to ananahi. Tera mahana to ˈna fifi.”—Mataio 6:34.

Eiaha e haapeapea rahi roa no ananahi. E nehenehe hoi te reira e tapea ia oe ia amo i te hopoia o te mau mahana atoa. Tera mahana hoi to ˈna fifi.

A haapeapea ai i te ohipa ino te tupu paha, e rahi atu â ïa to oe ahoaho e aita e papu faahou ia oe e e maitai mai te oraraa a muri aˈe.

EAHA TE RAVE? Manaˈo tauturu

A TIATONU I NIA I TE MEA MAITAI

Te parau ra te Bibilia: “Mea ino anaˈe te mau mahana o te taata hepohepo, area te taata e aau oaoa to ˈna, e tamaaraa noa ïa ta ˈna.” (Maseli 15:15) A feruri noa ai i nia i te fifi, eita paha oe e ite faahou i te mau ravea. Maoti râ te hoê feruriraa maitai, e imi oe i te mau ravea o te tauturu ia oe ia faaruru i te mau tupuraa fifi mau.

A taotia i to oe taime no te mataitai aore ra taio i te mau parau apî na te ao nei.
I te mau po atoa, a feruri i nia e piti aore ra toru ohipa ta oe e mauruuru ra.
A papai i te titauhia ia oe ia rave i te roaraa o te mahana. A tatuhaa i te mau ohipa rahi na roto i te mau tuhaa nainai aˈe. I te hopea o te mahana, e oaoa ïa oe i te iteraa e ua raea oe e rave rahi fa.

A IMI I TE TAUTURU

Te parau ra te Bibilia: “Eita [te taata o te faaatea ê mai ia ˈna] e farii i te paari mau taatoa.” (Maseli 18:1) Eita oe e nehenehe e haere i rapae i te hoê apoo hohonu ma to oe iho puai. Maoti râ te tauturu a te hoê hoa, e haere ia oe.

A ani i te tauturu i to oe utuafare e hoa.
A feruri atoa eaha ta oe e nehenehe e rave no te tauturu ia ratou. A na reira ai, eita oe e tiatonu rahi roa i nia i to oe mau fifi.
Mai te peu te manaˈo ra oe aita e ravea faahou aore ra mea au aˈe ia pohe, mea maitai aˈe ïa ia haere e hiˈo i te hoê taote. I te tahi mau taime, ua riro te hepohepo rahi ei tapao o te hoê maˈi, mai te ahoaho. E rave rahi tei tauturuhia maoti te rapaauraa horoahia e te hoê taote.a

a Aita te vea A ara mai na! e turai ra ia farii i te hoê ravea rapaauraa taa maitai.

Te horoa mai ra te Bibilia i te tiaturiraa papu

A pure ai i te Atua, ua parau te hoê taata papai salamo: “E mori to parau no to ˈu nei avae, e mori turama no to ˈu nei eˈa.” (Salamo 119:105) A hiˈo na no te aha e tano tera irava no te Bibilia, oia hoi te Parau a te Atua.

I roto i te poiri, e tauturu mai te hoê mori ia taa ihea tatou e haere ai. Hoê â huru no te Bibilia. E itehia i roto i tera buka te mau aˈoraa î i te paari o te aratai ia tatou, a rave ai i te mau faaotiraa rahi.

Maoti te mori turama, e ite atea tatou eaha to nia i to tatou eˈa. Hoê â huru no te Bibilia. E haamaramarama mai te Parau a te Atua ia tatou, ma te faaite papu e maitai mai to tatou a muri aˈe.

E buka moˈa te Bibilia. Aita tera buka e faaite noa i te aamu o te huitaata mai te omuaraa mai â. E horoa atoa râ i te hoê tiaturiraa papu no a muri aˈe. E pahono te Bibilia i tera mau uiraa:

E nafea?

E nafea te mauiui i haamata ai? Te na ô ra te Bibilia e “mai te hara i ô mai i te ao nei na roto i te taata hoê ra e te pohe na roto i te hara, e ua raea roa te mau taata atoa i te pohe no te mea ua hara ratou paatoa.”—Roma 5:12.

No te aha?

No te aha aita e haere i te taata ia faaafaro i te mau fifi? Te na ô ra te Bibilia e “eita e haere i te taata ia ite mai i to ˈna eˈa o ˈna anaˈe.” (Ieremia 10:23) Te haapapu ra te mau fifi na te ao nei e mea mau tera irava.

Eaha?

Eaha ta te Atua e rave no te faaafaro i te mau fifi? Te faaite ra te Bibilia e “e tamǎrô oia i te mau roimata atoa o to ratou mata. E ore roa te pohe, e ore atoa te oto e te auê e te mauiui.”—Apokalupo 21:4.