E maˈi to tei herehia
“I te mahana i matara mai ai papa i te fare maˈi, ua ani matou i te taote ia faataa faahou mai i te parau hiˈopoaraa toto o papa. Ua haapapu mai te taote aita e fifi, ua farii râ i te hiˈo faahou i te reira. Ua maere roa oia i te iteraa e piti ohipa fifi i roto! Ua ani mai oia ia farii i ta ˈna tatarahapa e ua niuniu i te tahi taote taa maitai. Mea maitai roa papa i teie nei. Auaa râ matou i ui ai i te taote.”—Maribel.
Na mua ˈˈe a farerei ai i te taote, a tapao eaha te mau vahi e mauiui ra te taata maˈi, oia atoa te iˈoa o te mau raau ta ˈna e rave ra
E ere i te mea ohie ia farerei i te taote e ia tapeahia i te fare maˈi. Mai ta te tupuraa o Maribel e faaite ra, e hinaaro te tahi hoa aore ra fetii i te tauturu i tera mau taime. Aita anaˈe, e nehenehe paha to ratou ea e ino atu â. E nafea ia tauturu atu?
Na mua ˈˈe ia farerei i te taote. A ani atu ia tapao eaha te mau vahi e mauiui ra, oia atoa te iˈoa o te mau raau ta ˈna e rave ra. A papai atoa i te tia ia ani i te taote. A tauturu i te hoa ia haamanaˈo eaha te tupuraa aore ra maˈi ta to ˈna fetii i farerei aˈenei. Eiaha e manaˈo ua ite aˈena aore ra e ani atu iho â te taote.
A haapao maitai, a ui i te taote ma te faatura e a tapao i te parauhia
I mua i te taote. A hiˈo maitai ua papu anei ia outou i ta te taote e parau ra. A horoa i te mau uiraa, eiaha râ e faahapa ˈtu. A vaiiho na te taata maˈi e ui e e paraparau i te taote. A haapao maitai e a tapao maite i tei parauhia. A ani eaha te mau ravea rapaauraa e vai ra. I te tahi mau taime, mea maitai aˈe ia faaitoito ia farerei i te tahi atu taote.
A haamanaˈo atu i ta te taote i parau e a hiˈo maitai eaha te mau raau i horoahia
I muri aˈe. A haamanaˈo atu i ta te taote i parau. A ara ua tano maitai anei te mau raau i horoahia. A faaitoito atu ia amu i te raau mai tei papaihia e ia faaara oioi i te taote ia ite oia i te tahi mea huru ê i nia ia ˈna. A haamanaˈo atu mea faufaa ia faaite i te manaˈo maitai e ia haapao i te mau aratairaa hau i horoahia, mai te tia ia ˈna ia rave ia maitai faahou to ˈna ea. A tauturu atoa ia ite atu â no nia i to ˈna maˈi.
I te fare maˈi
A ara ua faaî-maitai-hia te mau papie atoa
A faaite noa i te mǎrû e a haapao maitai. E haapeapea e e hepohepo paha te tahi ia tapeahia oia i te fare maˈi. Ma te faaite i te mǎrû e ma te haapao maitai, e tauturu oe i te taatoaraa ia vai hau e ia ore te tahi hape ia ravehia. A ara ua faaî-maitai-hia te mau papie atoa. A faatura i te taata maˈi ma te faaite atu i te mau faaotiraa atoa a te mau taote. Mai te peu mea ino roa oia, a ara ia haapaohia to ˈna mau hinaaro mai ta ˈna i tarima. A faatura atoa i te tiaraa o to ˈna fetii piri aore ra tei aupuru ia ˈna i roto i to ˈna maˈi.a
A faaite i to manaˈo i te mau taote e tuati ma te faatura
Eiaha ia taiâ i te faaite i to oe manaˈo. E nehenehe to oe faaahuraa tura e te mau peu maitatai e turai i te mau taote e tuati ia haapao maitai i te taata maˈi. E peneiaˈe, ia rapaau maitai roa ˈtu â ia ˈna. E farerei oia e rave rau taote i te fare maˈi. A tauturu ia ratou ma te faaite i ta te tahi atu mau taote i parau. O oe tei matau i te taata maˈi, a faaite ïa ia ite oe i te tahi mea tei taui i nia i to ˈna tino aore ra feruriraa.
A haapao eiaha ia rave na nia ê i to oe tiaraa
A faatura e a faaite i te mauruuru. E ere te ohipa a te mau taote e tuati i te mea ohie. Mai ta oe e hinaaro ia rave ratou, a na reira atoa ˈtu. (Mataio 7:12) A faatura i te mau taote ma te farii e feia aravihi e papu ratou. A haamauruuru atu no ta ratou mau tutavaraa. E nehenehe te reira e faaitoito atu ia rave maitai i ta ratou ohipa.
E maˈihia iho â tatou paatoa i te hoê mahana. Maoti râ te tauturu tano e feruri-maitai-hia, e nehenehe te hoa aore ra fetii e faaruru maitai aˈe i te fifi.—Maseli 17:17.
a Mea taa ê te mau ture e faanahoraa no nia i te tiaraa o te taata maˈi e te titauraa a te ture i tera e tera fenua. A ara ia tarima e ia faaapî noa te taata maˈi i te parau e faaite ra i to ˈna mau hinaaro atoa no nia i te rapaauraa i to ˈna ea.