Te iri ote pape o teie moo no Auteralia

E OTE te moo iri taratara no Auteralia (Moloch horridus) i te pape i roto i te rupehu, te haumi e te one rarirari. E faahaere oia i te pape ta ˈna i ote mai i to ˈna vaha no te haamâha i to ˈna poihâ. No te aha e tia ia ˈna ia na reira? No te faahiahia o to ˈna iri.

A hiˈo na: Ua î roa to ˈna iri i te poa mai to te moo taehae. Te manaˈo ra vetahi aivanaa e tahe na mua te pape i otehia mai i nia to ˈna mau poa. I muri iho, e haere i nia i to ˈna iri taratara a ô atu ai i roto i te mau faataheraa pape e vai ra i ropu i te mau poa. Mai reira ˈtu, e afaihia ˈtu ai te pape i na pae e piti o to ˈna vaha.

E nafea râ oia ia faahaere i te pape mai to ˈna na avae, na roto atu i to ˈna tino a tae atu ai i to ˈna vaha? E ere hoi mai tera te faanahoraa e ite-pinepine-hia! No te aha e tia ˈi i teie moo ia ote mai i te pape ma te oro noa to ˈna opu i nia i te mau vahi haumi?

E au ra ua tia i te mau aivanaa ia faataa i te reira. I te niaraa o to ˈna iri, te vai ra te mau faataheraa o te faahaere i te pape i roto i te tahi atu mau faataheraa i raro aˈe mai i roto roa i to ˈna iri. E haa tera mau faataheraa mai te mau uaua e faahaere i te toto i roto i te tino o te taata. No reira e tia ˈi ia ˈna ia faahaere i te pape na roto i te area haihai roa, mai te avae e tae atu i to ˈna vaha. E au ïa te iri o teie moo mai te rimu o te ote i te pape.

E peretiteni Janine Benyus no te pu e rave i te mau maimiraa no te hamani i te mau taoˈa apî ia au i te vai ra i roto i te natura. Te na ô ra oia e nehenehe te faanahoraa o te iri o teie moo e tauturu i te mau aivanaa. E ite ïa ratou nafea ia hamani hoê ravea maitai aˈe no te faahaumaru i te mau fare tahua na roto i te haumi e vai ra i roto i te reva. E e nafea atoa ia faariro i te reira ei pape inu.

Eaha to oe manaˈo? Mea tupu noa anei te iri ote pape o teie moo no Auteralia aore ra mea poietehia?