NA TE AO NEI

Taina

Ia faaauhia i na iva avaˈe matamua o te matahiti 2012, e 41 i nia i te hanere te maraaraa o te numera o te mau hoa faaipoipo i faataa i Pékin i tera noa â mau avaˈe i 2013. Te manaˈo nei te feia hiˈopoa e ua tupu te reira no te mea ua haamauhia te tahi tute apî e faahepo ra i te feia faaipoipo i hoo i te tahi fare ia horoa e 20 i nia i te hanere o te moni ta ratou i noaa mai. Ia au i te tahi mau titauraa, no te feia i faataa, e faaitihia tera tute ia hoo ratou i te piti o to ratou fare.

Na te ara

Ia amu te taata i te maa e tano, ua manaˈo te Nunaa Amui e e nehenehe e rave rahi e amu i te mau manumanu. E amuhia te mau mea ta te taata e ore e nehenehe e amu e te mau manumanu a riro atu ai te reira ei maa na te taata. Ia au i te faatiaraa, no te maitai e te hoona o tera faanahoraa, e riro te amuraa i te mau manumanu ei “ravea maitai no te faatamaa i te huiraatira aore ra i te puaatoro ta te taata e amu nei.” Te faaite atoa ra râ e “no vetahi nunaa taata, e mea faufau no ratou ia amu [i te mau manumanu.]”

Kanada

Te feruri nei te mau fare maˈi iti eaha te rave ia au i te ture e i te manaˈo o te taata no te mau huero ovahine faatǐtǒhia parauhia embryon tei paari i te toetoe. Aita hoi to ratou mau fatu e ite-faahou-hia ra. I roto noa hoê fare maˈi iti, ua tapaohia e te vai ra 1 000 huero ovahine oraora i faatǐtǒhia ma te tahi ravea apî o te tiai noa ra i to ratou mau fatu.

Irelane

Mai 2013 ra, e titauhia i te mau Katolika i Irelane ia maiti i te hoê faaipoiporaa i roto i te faaroo aore ra i mua i te tivira. E nehenehe atoa vetahi e faaoti e na te tahi atu pǔpǔ taata e faatupu i te reira. Ia au i te tahi faaiteraa a te vea Reuters, “ua maraa te numera o te feia e ani eiaha e faaipoipo noa i mua i te tivira, o te patoi atoa ra râ i te faaipoiporaa i roto i te faaroo, ua rahi ïa tei ani” i tera faanahoraa apî.