Te au-ore-raa i te nunaa ê

No roto mai te taata ia vai?

“Ua mairi ihora Adamu i to te vahine ra iˈoa, o Eva, no te mea, e riro oia ei metua vahine no te taata ora atoa.”—Genese 3:20.

TA TE FEIA ÎITE E PARAU RA

Ia au i te UNESCO (Faanahonahoraa o te mau Nunaa amui no te haapiiraa, te ihi e te taˈere), “hoê â huru to te mau taata atoa e hoê â tupuna to ratou.”—Déclaration sur la race et les préjugés raciaux, 1978.

TA TE BIBILIA E PARAU RA

Ua poiete te Atua ia Adamu raua Eva e ua na ô atu: “Ia fanau orua, e ia rahi roa, e faaî i te fenua nei, e e haavi iho.” (Genese 1:28) Ua riro ïa Adamu ei metua tane e Eva ei metua vahine no te mau taata atoa. I muri aˈe, ua pohe te rahiraa i te fenua nei i te diluvi. E maha anaˈe hoa faaipoipo tei ora mai, Noa e ta ˈna vahine, na reira atoa ta ˈna na tamaiti e toru e ta ratou vahine. Te haapii ra te Bibilia e no roto mai tatou paatoa i na tamaiti a Noa.—Genese 9:18, 19.

Te vai ra anei te tahi nunaa i hau aˈe i te tahi atu?

“Na [te Atua] i hamani i te taata i te mau fenua atoa nei i te toto o te taata hoê.”—Ohipa 17:26.

TA VETAHI I PARAU

I te senekele 20, e rave rahi pǔpǔ tei turu i te au-ore-raa i te nunaa ê. Ei hiˈoraa, no te mau Nazi, e mea taa ê to ratou mau tapao tupuna, te tiaturi nei ïa e mea hau aˈe to ratou nunaa i te tahi atu. I roto râ i te parau faaite a te UNESCO i faahitihia ˈtu, te parauhia ra e ua faito te mau taata atoa no te mea hoê â tupuna to ratou.

TA TE BIBILIA E PARAU RA

Te na ô ra te Ohipa 10:34, 35: “E ore te Atua e haapao i te huru o te taata. O tei mǎtaˈu râ ia ˈna, e o tei rave i te parau-tia i te mau fenua atoa ra, o te itehia mai ïa e ana.” No tera tumu, eita hoê noa ˈˈe taata e nehenehe e manaˈo e mea hau aˈe te tahi nunaa i te tahi atu.

Ua horoa Iesu i te aratairaa i te mau Kerisetiano a parau ai i ta ˈna mau pǐpǐ: “E taeae anaˈe hoi outou atoa.” (Mataio 23:8) Ua pure oia ia vai hoê e ia “tia to ratou amuiraa” eiaha râ ia amahamaha aore ra ia hiˈo ino i te taata no te nunaa ê.—Ioane 17:20-23; Korinetia 1, 1:10.

E faaea anei te taata i te au ore i te nunaa ê i te hoê mahana?

“E riro ia tae i te mau mahana hopea ra, e faatiahia te mouˈa ra o te fare o Iehova . . . ; e tairuru atoa mai te mau etene [“nunaa,” “Traduction du monde nouveau”] atoa ra i reira.”—Isaia 2:2.

TA VETAHI E MANAˈO RA

Te tupu noa ra te fifi no te au-ore-raa i te nunaa ê. I te fenua e rave rahi, te vai ra te uiui nei e ua taui mau anei te manaˈo o te rahiraa no nia i te taata no te nunaa ê. Te na ô nei ïa vetahi, eita roa e nehenehe e faaore i te au-ore-raa i te nunaa ê i te hoê mahana.

TA TE BIBILIA E PARAU RA

Eita te Atua e vaiiho i te taata ia na reira e a muri noa ˈtu. I raro aˈe i ta ˈna Basileia, e tavini te mau tane e vahine “no te mau fenua atoa, e te mau opu atoa, e te mau nunaa atoa, e te mau reo atoa” ia ˈna ma te tahoê. E itehia ïa te here mau i rotopu ia ratou. (Apokalupo 7:9) E ere te Basileia o te Atua i te tahi mea i roto i te aau, e faatereraa râ o te taui mau i te fenua nei, te vahi ta ˈna i faanaho ia parahi te taata atoa. Eita ïa te au-ore-raa i te nunaa ê e ite-faahou-hia.a