TUMU PARAU MATAMUA | NO TE AHA E FAAOROMAI AI?
1 No te mea e taui te tupuraa
“Ua ati matou i te pohe, aita râ i apǐapǐ; ua peapea matou, aita râ i ahoaho.”—KORINETIA 2, 4:8.
Ua parauhia e o te haapoheraa ia ˈna iho te ravea hopea no te tahi tupuraa fifi e nehenehe e taui. No oe, aita e ravea faahou no te tahi peapea rahi, noa ˈtu e mea fifi ia farii, e nehenehe to oe tupuraa e taui.—A hiˈo i te tumu parau tarenihia “Ua maitai mai to ratou oraraa.”
E noa ˈtu e eita te tupuraa e taui, mea maitai aˈe ia feruri i te ravea no te fifi o teie mahana. Ua parau Iesu, “eiaha e tapitapi i to ananahi ra, na ananahi hoi e tapitapi i ta ˈna iho. O te mahana o to ˈna iho ino atire ïa.”—Mataio 6:34.
E maˈi tamau anei to oe? Ua taa anei oe e to hoa faaipoipo? Ua pohe anei te tahi taata herehia e oe? Eita iho â e nehenehe e taui i te reira.
Mea ohie aˈe ïa no oe ia rave i te hoê faaotiraa maitai ia taui oe i to oe huru i mua i tera mau tupuraa. (Maseli 15:15) I muri aˈe, e nehenehe oe e feruri i te rave no te faaruru i tera e tera fifi, eiaha râ e faaoti taue noa i te haapohe ia oe. Ma te na reira, te haamata ra ïa oe i te faaafaro i te tahi tupuraa ta oe i manaˈo na e aita e ravea.—Ioba 2:10.
A HAAMANAˈO: Noa ˈtu eaha te mau fifi ta oe e farerei ra, a faaafaro na mua hoê.
TA OE E NEHENEHE E RAVE I TEIE MAHANA: A faaite i to oe fifi i te tahi atu taata, mai te hoê hoa aore ra fetii. E nehenehe oia e tauturu ia oe ia ite i te ravea maitai aˈe.—Maseli 11:14.