Mea faahiahia mau to oe roimata!
MAI te aiûraa mai â, e taˈi tatou. O te ravea matamua tera e itehia ˈi e mea oraora roa te pêpe. Ua faataa te tahi taata îite e e taˈi te taata no te faaite i to ˈna hinaaro ia haapaohia o ˈna mai te aiû. No te aha râ te roimata e tahe ai a paari noa ˈi tatou? Te vai ra hoi te tahi atu â ravea no te faaite i to tatou huru!
E tahe to tatou roimata no te mau tumu e rave rau. E taˈi paha tatou no te ati, inoino, mauiui aore ra no te hepohepo. E taˈi atoa râ ia oaoa rahi, ia tamahanahanahia mai e ia manuïa te tahi opuaraa. E roimata no te oaoa ïa te reira. E nehenehe atoa te taata e taˈi a ite ai ia vetahi ê ia na reira. Te na ô ra María: “Noa ˈtu eaha te tumu te tahi taata e taˈi ai, ia hiˈo vau ia ˈna, e taˈi atoa vau.” A mataitai ai i te hohoˈa tavirihia aore ra a taio ai i te hoê buka, e taˈi atoa paha oe.
Te faataa ra te buka Adult Crying, “e nehenehe e faaite oioi i te tahi mea faufaa ma te tahi atu mau ravea.” Ma te ore ïa e paraparau, e ravea te roimata no te faaite i te tahi poroi. E hinaaro iho â tatou e rave i te tahi mea a ite ai ia vetahi ê ia taˈi. Ei hiˈoraa, e tâuˈa te rahiraa o tatou ia taˈi te tahi taata no te ati, te faaite mai ra hoi e te mauiui ra o ˈna. E tamata ïa tatou i te tamahanahana aore ra i te tauturu i te taata e taˈi ra.
No vetahi taata îite, e maitaihia te taata ia taˈi, te auraa ïa, ia ore vetahi ia na reira, e fifi to ratou ea. Te na ô ra te tahi atu e aita te mau aivanaa i haapapu atura e maitai te tino aore ra te feruriraa ia taˈi tatou. Ia au i te tahi uiuiraa manaˈo, e 85 i nia i te hanere o te mau vahine e 73 i nia i te hanere o te mau tane tei faaite e ua maitai mai ratou i muri aˈe. Te faataa ra Noemí, “No ˈu, mea maitai ia taˈi. Te na reira nei au i te tahi taime. I muri aˈe, e nehenehe au e huti maitai i te aho e e feruri maite.”
Ia au i te tahi uiuiraa manaˈo, e 85 i nia i te hanere o te mau vahine e 73 i nia i te hanere o te mau tane tei faaite e ua maitai mai ratou i muri aˈe i to ratou taˈiraa
E ere râ no te mea ua taˈi te tahi taata, e maitai mai iho â ïa o ˈna. Mea faufaa atoa to vetahi ê huru a ite ai ia ˈna ia taˈi. Ia tamahanahana aore ra ia tauturu mai vetahi ê, e maitai mai tatou. Ia ore, e haama aore ra e inoino paha.
Aita ïa tatou i ite i te mau mea atoa no nia i te taˈi. Te mea papu, hoê tera o te mau ravea ta te Atua i horoa mai no te faaite i to tatou huru.