Te mata o te tuturahonui ouˈa

MEA taa ê mau te hamaniraa o te mata o te tuturahonui ouˈa. E nehenehe ta ˈna e numera mai teihea atearaa e ouˈa ˈi. E nafea?

A hiˈo na: No te ite i te atearaa o te tahi mea i te tahi atu, e faaohipa oia i to ˈna na mata rahi e piti. I roto i tera na mata taitahi e vai ai e maha tuhaa o te rétine. Maoti na tuhaa e ite ra i te û matie e papu maitai ai ia ˈna i ta ˈna e hiˈo ra. I te tahi atu râ tuhaa eita ïa. E au ra e ia faaohipa te tuturahonui i tera tuhaa o to ˈna mata e rahi mai te hohoˈa o te mea ta ˈna e hiˈo ra. Mea na reira ïa oia e ite ai eaha te atearaa e tano no te ouˈa e no te haru i te tahi manumanu.

Te hinaaro ra te mau aivanaa e faaohipa i te faanahoraa o te mata o tera tuturahonui no te hamani i te pata hohoˈa 3-D oia atoa i te mau matini uira e nehenehe e ite i te atearaa o te tahi mea i te tahi atu. Mea taa ê mau ïa te mata o tera tuturahonui. O ta te reni ScienceNOW iho â ïa e parau ra: “Mea faahiahia mau ia ite e noa ˈtu e e 50 milimetera to teie animara e e mea haihai aˈe to ˈna roro i to te raˈo, e nehenehe ia ˈna e haapue e rave rahi haamaramaramaraa e e ohipa maoti noa te hamaniraa taa ê o to ˈna nau mata.”

Eaha to oe manaˈo? Mea tupu noa anei te mata o te tuturahonui ouˈa? Aore ra mea poietehia anei?