E ere paha i te mea ohie no oe e to hoa faaipoipo ia tauaparau ma te mǎrû. Maa mea iti noa ta oe e parau aore ra e rave, e ura anei ïa to hoa?
Mai te peu e tera iho â, e nehenehe e taui. Na mua râ, e titauhia ia ite orua i te tumu e pinepine ai te tatamaˈiraa.
TE TUMU
Te taa-ore-raa.
Te na ô ra Jilliana: “I te tahi taime, e parau vau i te hoê mea i ta ˈu tane eiaha râ mai ta ˈu i manaˈo. Aore râ, no ˈu e au ra e ua faaite au ia ˈna i te tahi mea, te tupuraa mau râ, e ere ïa. Mai tera noa mâua!”
Te taa-ê-raa.
Noa ˈtu e ua tano oe i to hoa faaipoipo, mea taa ê iho â to orua manaˈo no nia i te tahi mea. No te aha? No te mea i te ao nei, eita e piti taata e tuea roa. E nehenehe ïa te faaipoiporaa e riro ei oaoaraa. Aore ra mai no te rahiraa, ei fifi.
Hiˈoraa tano ore.
Te parau ra Rachel: “I tatamaˈi noa na to ˈu na metua. Aita raua e faatura ra ia raua. No reira, a faaipoipo ai au, e paraparau vau i ta ˈu tane mai ia mama i nia ia papa. Aita vau i ite eaha tera mea faatura.”
A feruri i te tumu mau.
E pinepine te hoa faaipoipo i te riri no te tumu ê eiaha râ no tei tupu noa ˈtura. Ei hiˈoraa, e haamata te tatamaˈiraa mai teie: “A tahi ra oe e hoˈi mai ai?” E ere paha te fifi e ua taere oe, no ˈna râ aita o ˈna i faaturahia.
Noa ˈtu eaha te tumu, eita oe e oaoa ia tatamaˈi noa orua. E nehenehe atoa vetahi e faataa ê roa. E nafea ïa ia faaea i te na reira?
E NAFEA?
Te tahi ravea, o te taaraa ïa i te tumu o te tatamaˈiraa. Ia hau orua, a rave na mai te faaitehia i raro nei.
1. A rave e piti api parau, hoê na oe, te tahi atu na to hoa faaipoipo. A papai i te tumu i tatamaˈi ai orua. Ei hiˈoraa, e tapao paha te tane: “Na muri noa oe i to oe mau hoa i te mahana taatoa. Aita ˈtoa oe i niuniu mai e no te parau teihea roa oe.” E papai te vahine: “Eita iho â pai oe e au ia haere au e to ˈu mau hoa.”
2. Ma te ore e faaoti ru, a ui ia orua: E fifi rahi mau anei iho â? E nehenehe anei e faaore i te hapa? I te tahi taime, ia vai noa te hau, mea maitai aˈe paha ia farii e mea taa ê to orua manaˈo e ia faaore i te hapa maoti te here.—Faaueraa tumu:Maseli 17:9.
Mai te peu e no orua e hapa rii tera, a tatarahapa ˈtu te tahi i te tahi e eiaha e faahiti faahou atu.—Faaueraa tumu:Ephesia 4:32.
E fifi rahi anaˈe te reira no te hoê aore ra no orua, a faaohipa i to muri nei mau manaˈo.
3. A papai orua toopiti i to orua huru a tupu ai te tatamaˈiraa. Ei hiˈoraa, e papai paha te tane: “Mea au aˈe na oe i te mau hoa ia ˈu,” te vahine: “E tamarii noâ vau no oe, e au oe i to ˈu papa.”
4. A horoa i ta oe api parau i to hoa faaipoipo a tauaparau atu ai. Eaha te huru mau o to hoa a tatamaˈi ai orua? A feruri e nafea orua e nehenehe ai e faaite i te tumu mau o te fifi ma te ore e tatamaˈi.—Faaueraa tumu:Maseli 29:11.
5. A tauaparau i ta orua i haapii maoti te mau manaˈo tauturu i nia ˈtu. Ma te faaohipa i teie tumu parau, e nafea orua e nehenehe ai e faaafaro i te fifi aore ra e ore ai e tatamaˈi faahou?
