O vai na o Iesu Mesia?

I teie avaˈe o te matahiti i roto e rave rahi fenua na te ao nei, te faatupuhia ra te mau oroa Noela. Te tiaturi nei te mau hanere mirioni taata e ua fanauhia o Iesu Mesia i te 25 no Titema a 2 000 matahiti i teie nei. I nia i te mau hohoˈa penihia e taraihia, e rave rau mau hohoˈa no nia ia ˈna ei aiû i roto i ta te animala vairaa maa. Parau mau râ, ua paari mai e ua ora oia i nia i te fenua e 33 matahiti e te afa.

AITA anei oe i manaˈonaˈo aˈena i te huru o te tino o Iesu a vai taata paari ai? Mai te aha te huru o te iri o to ˈna hohoˈa mata? E tino pautuutu anei to ˈna e te haviti, aore ra e tino paruparu e te maˈimaˈi te huru, mai tei faaitehia e te mau taata peni tuiroo e rave rau i te roaraa o te mau senekele? Ua hahuhia anei to ˈna taa aore ra e huruhuru taa to ˈna? E rouru roroa anei to ˈna?

Hau atu, e hei hanahana anei to Iesu, mai te hoê hei anaana ati aˈe to ˈna upoo mai tei penihia e vetahi mau taata tuiroo? Aore ra ua taa ê anei i te mea mau—e aita e vai ra teie mea no te faataa ê ia ˈna, e nehenehe râ o ˈna e moe i rotopu i te tiaa taata?

Ua horoahia te mau manaˈo patoi e te feia tuatapapa aamu o te ao nei e te feia peni tuiroo i te roaraa o te tau no nia i te huru o te tino o Iesu. Na nia ˈˈe, ua horoahia te mau haapapuraa tano na roto i te mau aamu o te feia i ite mata ia ˈna o tei papaihia e te feia papai Bibilia i ora na i te senekele matamua e i faaea na i pihai iho ia ˈna.

Area râ, teie i muri nei, te mau uiraa hau roa ˈtu i te mea faufaa i te huru na o to ˈna tino: O vai mau na o Iesu Mesia? Eaha ta ˈna tuhaa i roto i te opuaraa a te Atua? Ua rave faahope anei o ˈna i taua tuhaa ra? I teie nei mahana, o vai oia e teihea oia? E tiaraa faufaa roa anei to ˈna a roohia ˈi te huitaata atoa i ta ˈna ohiparaa, e tae roa ˈtu i te rahiraa i pohe na?

Na mua ˈˈe, e hiˈopoa tatou i te parau papu no nia i te huru o Iesu. Mai te aha na oia?