No te aha oia i ore ai e tiaturi i te Atua?
UA FAAITE o Olesya, te hoê vahine apî no Rustavi, i Géorgie, te hoê repubilita e tuhaa no te mau Hau Amui no Rusia tahito ra, i na ratere e piti, i te hoê hohoˈa o to ˈna mau metua e ua parau ihora e: “Ahiri e te vai ra te hoê Atua, eita ïa oia e vaiiho ia pohe to ˈu mau metua a apî noa ˈi raua!” I muri aˈe i to Tamazi, te tane a Olesya, hoˈiraa mai i te fare, ua vaiiho te mau ratere na raua i te mau vea iti ra E oaoa oe i te fenua e a muri noa ˈtu! e “Inaha, te faaapî nei au i te mau mea atoa nei.”
Ia hoˈi-faahou-hia ˈtu e farerei i na feia faaipoipo, ua oti ia Olesya i te taiohia te vea iti ra “Inaha” e te hinaaro ra oia e haapii i te Bibilia. Ua au roa oia i ta ˈna i taio. I roto i te tauaparauraa i tupu i reira, ua oioi roa oia i te hohora i te vea iti e te taio i te mau vahi ta ˈna i reni. Ua putapû roa oia i te mau haaferuriraa tano maitai.
Ei hiˈoraa, te parau ra te vea iti e: “Te mau mea faahiahia atoa e haaati ra ia tatou nei, te mau tiare, te mau manu, te mau animala, te taata, te semeio o te ora e te fanauraa, te haapapu maira taua mau mea atoa nei i te Maramarama teitei aˈe tei riro ei Tumu no te reira. (Roma 1:20) Inaha, ia parau tatou i te parau no te maramarama e parau atoa ïa tatou i te parau no te feruriraa. E ia parauhia te parau no te feruriraa ra, e parau-atoa-hia ïa te parau no te taata. Te maramarama teitei roa ˈˈe, te maramarama ïa o te Taata teitei roa ˈˈe, oia hoi te Poiete i te mau mea ora atoa nei, te Tumu iho no te ora. (Salamo 36:9) E tia mau â te Poiete ia faahanahanahia e ia haamorihia.—Salamo 104:24; Apokalupo 4:11.”
Ua faˈi o Olesya i muri iho e na te tǎpǔ a te Atua e faatia faahou i te feia here i pohe i turai ia ˈna ia hinaaro e haapii i te Bibilia. Te tiaturi nei matou e e faufaa-atoa-hia outou i te mau parau o te haapuai i te faaroo e vai ra i roto i taua nau vea iti ra. Ia hinaaro outou i te hoê vea iti E oaoa oe i te fenua e a muri noa ˈtu! e hoê “Inaha, te faaapî nei au i te mau mea atoa nei” aore ra ia haere mai te hoê taata ia outou ra e faatere i te hoê haapiiraa Bibilia tamoni ore, a papai atu i te Taatiraa “Te mau Ite no Iehova,” B.P. 7715, 98719 Taravao, TAHITI, aore ra i te hoê o te mau vahi nohoraa i te api 5.