Te papai mai nei te feia taio

Te papai mai nei te feia taio Ua taio tamau vau i te A ara mai na! e 26 matahiti te maoro, e te au noâ ra vau i teie nei vea. Eita roa ˈtu e moehia ia ˈu ia taio i te tuhaa ra “Te papai mai nei te feia taio,” no te mea te turai pinepine nei te mau manaˈo ia ˈu ia taio faahou i te hoê tumu parau. Mauruuru no teie mau vea faahiahia roa.

M. B., Farani

Faaanaanataeraa maitatai Te haapii nei au no te riro mai ei Ite no Iehova, e te hinaaro nei au e haamauruuru ia outou no te neneiraa i te mau tumu parau ra “Te imiraa i te mau peu faaanaanataeraa maitatai.” (8 no Me 1997) Mea iti roa te mau mea e mataitai i roto i te tele, e ua horoa mai outou na matou paatoa—te feia apî e te feia paari—i te mau aˈoraa maitatai roa. Te tiaturi nei au e e tamau noa outou i te horoa mai na matou i te mau haamaramaramaraa no nia i te mau tumu parau mai teie te huru.

D. W., Hau Amui no Marite

E riro noa anei te Atua ei Hoa no ˈu? Te mauruuru rahi nei au i to tatou Poiete maitai no te tumu parau faahiahia roa ra “Te uiui nei te mau taurearea . . . E riro noa anei te Atua ei Hoa no ˈu?” (8 no Me 1997) Aita i maoro roa ˈˈenei, ua faaî au i te hoê uiuiraa no nia i te rahiraa hoa e noaa mai ia ˈu, e ua haapapu mai te faahopearaa ia ˈu e e haaati-noa-hia vau e te mau hoa. Te vahi peapea râ, e mea hape roa te reira. Noa ˈtu râ, te taa ra ia ˈu e o te Atua ra o Iehova anaˈe to tatou Hoa rahi roa ˈˈe. E parau mau e ia ore tatou e riro ei hoa no te Atua ra o Iehova, aita ïa e faufaa to te tahi atu mau mea atoa.

A. T. M., Mexiko

Mauruuru no te anaanatae o ta outou e faaite ra i nia i te feia apî. Ua tae mai te tumu parau ra “Te uiui nei te mau taurearea . . . E riro noa anei te Atua ei Hoa no ˈu?” i te taime i hinaaro-rahi-hia e au. Ua tiavaruhia na vau e ua faahoˈihia mai au aita i maoro aˈenei. I te tahi mau taime, e moemoe au e mea rahi to ˈu mau manaˈo feaa—mai teie, Te faaroo maira anei te Atua ia ˈu? I muri aˈe i te hiˈopoaraa i te hiˈoraa o Paulo i raro aˈe i te tumu parau iti ra ‘Te hoê tara i roto i te tino nei,’ ua opua ˈtura vau e imi i te haamaitairaa a Iehova ra na roto i te haapiiraa Bibilia tamau e te pure haavare ore. Ua pahono-maitai-hia mai te uiraa, E riro noa anei o Iehova ei hoa no ˈu?

J. C. A., Raparata

Haapaoraa i te feia maˈi Mauruuru no to outou neneiraa i te mau tumu parau ra “Te haapaoraa i te feia maˈi—A faaruru i te fifi.” (8 no Febuare 1997) E mariri ai taata to to ˈu metua vahine, e ua rohirohi roa vau i te haapaoraa ia ˈna i te mau taime hopea o to ˈna maˈi. Te faataa maitai ra te mau tumu parau i te mau manaˈo o te taata haapao e te faaite ra ia vetahi ê e nafea ia haapao atu i te feia i rotopu ia matou i roto i taua tupuraa ra. E mea varavara ia ite i teie mau tumu parau.

F. T., Taiwan

Faaamuraa manu meli Te papai atu nei au no nia i te tumu parau ra “Faaamuraa manu meli—Te hoê aamu ‘au roa’” (8 no Me 1997), i roto, ua horoa poto noa outou i te mau haamaramaramaraa tano no nia i te mau manu meli. Ua au vau i te tuatiraa e au o te mau faataaraa, te mau hohoˈa, e te mau manaˈo—aita hoê aˈe hape. Te ite pinepine nei te hoê taata faaamu manu meli i te mau haamaramaramaraa hape aore ra aita i tano roa i roto i te mau parau apî, area i roto i ta outou tumu parau ra, e mea tano ïa. E taata faaamu manu meli anaanatae au, e te ite pinepine nei au e mea ‘maramarama’ aˈe teie mau manumanu i te mau taata e rave rahi. No reira vau e manaˈo ai e mea tia ia ˈu ia parau e no nia i teie tumu parau, ua arue outou i te nehenehe o te ora, mai tei haamatarahia iho â râ i roto i teie mau mea ora nainai.

P. G. M., Italia

No te aha e maˈi-roa-hia ˈi? Te faaruru nei au i te mau manaˈo horuhoru atoa i faahitihia e Jason i roto i te tumu parau ra “Te uiui nei te mau taurearea . . . No te aha vau e maˈi-roa-hia ˈi?” (8 no Eperera 1997) I te mau taime atoa e taio ai au i te tumu parau, e au e te paraparau ra vau e te hoê taata e taa ra e e haapao maira i to ˈu fifi. Mauruuru roa no to outou haamâmâraa i to ˈu fifi teimaha. Ua ite au e te haapao maira Iehova e ia tae i te taime o ta ˈna i faataa, e faaore roa oia i te mau maˈi atoa.

O. A., Ghana