Ia mau te roro!

HOÊ o te mau tumu matamua e pohe ai e e hapepa ˈi te taata i roto i te mau fenua ona no te pae Tooa o te râ ma, o te mauraa ïa o te roro. E tupu taue noa teie maˈi. I teie taime, mea maitai roa outou, e i te taime i muri iho, e au ra e ua haruhia outou i te anapa uira—e nehenehe hoi te hoê mauraa roro rahi e taui taue noa i to outou oraraa taatoa. Ma te haapepe e te faahapepa roa ia outou, e nehenehe oia e haamamû ia outou, e faahuehue i to outou mau huru hohonu, e taui i to outou huru e to outou feruriraa, e e faahepo ia outou ia aro ma te tuutuu ore no te fanaˈo faahou i te oraraa i matauhia na e outou e to outou utuafare i mutaa iho.

A rave na ia Ellen Morgan.a I te Mahana toru, e vahine oraora maitai e te ohipa roa o Ellen, 64 matahiti. I te Mahana maha, a hoohoo haere ai oia e ta ˈna tane, aita ˈtura ta Ellen i nehenehe faahou e paraparau, e ua taui roa to ˈna hohoˈa mata. Ua paruparu to ˈna tino, e ua peretete noa ˈtura oia mai te hoê taero ava ra te huru. Ua roohia ïa o Ellen i te hoê mauraa roro rahi!

I muri aˈe i taua mauraa o te roro ra, ua hapepa roa o Ellen e eita ˈtura ta ˈna e nehenehe faahou e rave i te mau ohipa ohie roa, mai te hopuraa i te pape aore ra te oomoraa i to ˈna ahu. Eita ta ˈna e nehenehe e papai, e nino, aore ra e nira i te ahu, e e taˈi noa oia ma te tumu ore e e rohirohi roa oia. I roto i taua fifi atoa ra, aita te feruriraa o Ellen i ino aˈe; mea haama roa râ na ˈna ia manaˈo anaˈe oia e peneiaˈe, te manaˈo ra te taata e e vahine maau oia. I muri aˈe, ua faataa mai o Ellen e: “Eita te taata e taa i te hepohepo rahi ta teie tauiraa taue e faatupu i nia i te hoê taata i te pae no te huru hohonu e i te pae feruriraa. Ua tae roa vau i te manaˈo e, o te hopea paha o to ˈu oraraa ei taata mau.”

Na te aha e faatupu i te mauraa o te roro? Te mau taata e roohia nei i te mauraa o te roro, hoê â anei faahopearaa ta ratou e ite ra? E te feia i ora mai, mea nafea to ratou faarururaa i teie maˈi? Nafea atoa te mau utuafare o te feia i ora mai i te mauraa o te roro, ia faaruru? Eaha ta tatou paatoa e nehenehe e rave no te turu atu? Ua tuatapapa o A ara mai na! i teie mau uiraa e e horoa atoa mai oia i te mau haamaramaramaraa no nia i te oraraa o te feia i ora mai i te mauraa o te roro, e te oraraa o to ratou utuafare o tei turu ia ratou i roto i ta ratou aroraa.

[Nota i raro i te api]