Te mau maˈi pee—E tapao anei no te hopea?

UA RIRO anei te mau maˈi pee no to tatou nei tau ei tapao faaite e te fatata maira te hopea o teie nei ao? Hou tatou e pahono ai i teie uiraa, e hiˈo anaˈe na e eaha mau na te auraa o te parau ra “te hopea o teie nei ao.”

E rave rahi mau taata o te tiaturi nei e, te hopea o teie nei ao, o te haamouraa ïa te Atua i te fenua nei e te ora atoa i nia iho. Teie râ, te na ô ra te Parau a te Atua e “ua hamani râ oia [i te fenua] ia taatahia.” (Isaia 45:18) Ta ˈna opuaraa, o te faaîraa ïa i te palaneta e te mau taata oraora maitai e te oaoa, tei hiaai i te pee i ta ˈna mau aveia parau-tia. No reira, te hopea o teie nei ao, e ere ïa te hopea o te fenua nei e o to ˈna mau taata atoa. Area râ, o te hopea ïa o teie nei faanahoraa e o te feia i roto ia ˈna e patoi nei i te rave i te hinaaro o te Atua.

O ta te aposetolo Petero ïa i faaite, ia ˈna i papai e: “I pohe ai te reira [“ao,” MN] [i te tau o Noa ra] i te ninaraahia e te miti.” I te taime a haamouhia ˈi te ao i te tau o Noa, o te feia iino tei pohe. Ua vai noa mai te fenua e ua ora atoa mai te taata parau-tia ra o Noa e to ˈna utuafare fetii. Mai ta Petero e parau ra i muri iho, e ohipa faahou mai te Atua i mua nei no te faatupu “i te poheraa o te feia paieti ore ra.”—Petero 2, 3:6, 7.

Te turu atoa ra te tahi atu mau irava Bibilia i teie nei manaˈo. Ei hiˈoraa, te na ô ra te Maseli 2:21, 22 e: “Na te feia piˈo ore hoi e parahi i te fenua, e te feia parau-tia te haapapuhia i reira; e tâpû-ê-hia ra te paieti ore i te fenua nei, e te feia i rave i te hara ra, e taihitumuhia ïa.”—A hiˈo atoa te Salamo 37:9-11.

Te mau maˈi pee e te hopea o teie nei ao

Afea râ te reira e tupu ai? E maha pǐpǐ a Iesu o tei ui na i taua uiraa ra ia ˈna. Ua ani hoi ratou e: “[Eaha] te tapao o to oe taeraa mai e te hopea o teie nei ao?” Ua pahono atura o Iesu e: “E tia mai hoi te tahi fenua e aro mai i te tahi fenua, e te tahi basileia e aro mai i te tahi basileia; e oˈe hoi, . . . e e aueue fenua i tera vahi, i tera vahi.” (Mataio 24:3, 7) I roto i te faatiaraa tuea i roto i te Luka 21:10, 11, ua na ô â o Iesu e: “I tera vahi, i tera vahi, . . . te maˈi rahi, e te mea mehameha e te semeio rahi i te itearaa i nia i te raˈi.”

A tapao na e aita o Iesu i parau e, o te mau maˈi anaˈe te faaite e te piri maira te hopea. Area râ, ua faahiti atoa oia i te mau tamaˈi rahi, te mau aueueraa fenua, e te mau oˈe. I roto i ta ˈna parau tohu vauvau-huˈahuˈa-hia i roto i te Mataio 24 e 25, te Mareko 13, e te Luka 21, ua tohu o Iesu e rave rahi mau mea ê atu o te tupu. E tia hoi ia tupu teie mau mea atoa i te hoê â taime hou te Atua e ohipa mai ai no te haamou i te ino i nia i te fenua nei. Te ite-papu-hia ra e tei roto tatou i taua tau ra i teie nei.

Te paradaiso i mua nei

Eita te huitaata nei e mou roa i mua nei, na roto anei i te maˈi pee aore ra na roto i te rima o te Atua. Te tǎpǔ nei hoi te Atua ra o Iehova e e faariro oia i teie fenua ei paradaiso. (Luka 23:43) Taa ê atu i te tahi atu mau mea, e faaore roa oia i te mau maˈi e tairi nei i te huitaata.

E papu tatou i te reira ia hiˈo anaˈe tatou i te taviniraa a Iesu Mesia, o tei faaite i te mau huru maitatai o to ˈna Metua ma te tia roa. Ma te mana o to ˈna Metua i nia i te raˈi ra, ua faaora o Iesu i te feia pirioi, te paruparu, te matapo, e te vava. (Mataio 15:30, 31) Ua faaora atoa oia i te feia i roohia i te maˈi lepera. (Luka 17:12-14) Ua faaora oia i te hoê vahine pohehia i te tapahi, te hoê taata rima mǎrô, e te hoê taata maˈi hopue. (Mareko 3:3-5; 5:25-29; Luka 14:2-4) Ua rapaau oia i “te lunati [hopii], e te hapepa.” (Mataio 4:24) E toru taime to ˈna faatia-atoa-raa mai i te feia pohe!—Luka 7:11-15; 8:49-56; Ioane 11:38-44.

Te haapapu maira teie mau faaoraraa semeio e e nehenehe te parau tǎpǔ a te Atua e tiaturihia, oia, i te tau i mua nei o ta ˈna i opua, “e ore hoi to reira e parau e, Ua paruparu vau i te maˈi.” (Isaia 33:24) Eita roa ˈtu te mau maˈi pee e faaere faahou i te taata i te oraora-maitai-raa e te ora. Auê tatou i te mauruuru e i to tatou Poiete here tei ia ˈna te mana e te hinaaro e tumâ roa i te paruparu e te maˈi e a muri noa ˈtu!—Apokalupo 21:3, 4.

[Hohoˈa i te api 9]

Ma te mana o te Atua, ua faaora o Iesu i te feia maˈi

[Hohoˈa i te api 10]

I roto i te Paradaiso i mua nei i nia i te fenua, e tumâ roa o Iehova i te paruparu e te maˈi