Ua faaite aˈena mai o A ara mai na! i te matahiti 1990 ra

UA FAATUPU iho nei te parareraa te “maˈi o te puaatoro maamaa” i te faaararaa rahi i Europa. E rave rahi tei mǎtaˈu e ia peehia te taata i taua maˈi ra. Te manaˈo atoa ra vetahi e te vai ra te hoê taairaa i rotopu i te amuraa i te iˈo o te mau animala maˈi e te tupuraa o te maˈi a Creutzfeldt-Jakob, te hoê maˈi o te tupu mǎrû noa e o te haapohe, i nia i te pu faanahoraa uaua uira o te taata. Eita e maerehia e i te atuturaa te parau apî no nia i te maˈi o te puaatoro maamaa, ua iti taue roa mai te feia e amu i te iˈo puaatoro.

Te vahi anaanatae, ua papai o Stefania Ferrari i roto i te vea Italia ra TuttoReggio no Me 1996 e: “Ua iteahia e matou te hoê vea o tei faaite aˈena i teie ati riaria i roto i te A ara mai na! o te matahiti 1990, neneihia e te mau Ite no Iehova.” Te tumu parau o te vea ta ˈna i faahiti oia ïa, “Te fifi o te ‘puaatoro maamaa’ no Beretane” e ua matara mai te reira i roto i te vea o te 8 no Novema 1990 (Farani). I muri aˈe i to ˈna faahitiraa i na paratarapha matamua e maha, ua faaite o Ferrari i to ˈna maere e ua matara mai te tumu parau “e ono matahiti na mua ˈˈe a faaitehia ˈi te fifi i te huiraatira na te ao nei.” Ua na ô faahou oia e: “I to vetahi iteraa i teie tumu parau o te matahiti 1990 o tei faaite i teie huru parau apî maere, ua parau paha ratou e: ‘Ahiri e ua ite te mau Ite no Iehova i teie huru fifi atâta e te rahi, no te aha ïa ratou i ore ai i faaite haere i te mau taata atoa, e tae noa ˈtu i te feia aita i roto i ta ratou mau amuiraa?’ A feruri na râ: Ahiri e ua patoto mai te hoê Ite no Iehova i to tatou opani i te matahiti 1990 ra, ma te faaite mai ia tatou i te Bibilia e i taua tumu parau ra tei neneihia i roto i ta ratou vea, ehia rahiraa o tatou nei e haapaoraa ê hoi e tiaturi atu i ta ratou parau?”

I te matahiti 1990 ra, i te piaraahia te tumu parau ra “Te fifi o te ‘puaatoro maamaa’ no Beretane,” tau 12 mirioni A ara mai na! i te faito au noa tei neneihia na roto e 62 reo. Ua opere rahi te mau Ite no Iehova i teie vea tano maitai i roto hau atu i te 200 fenua na te ao nei. I teie mahana, 18 350 000 A ara mai na! i te faito au noa e neneihia ra na roto e 82 reo. Te tamau noa ra teie vea i te pia i te mau tumu parau apî haamaramarama. Mai te peu e e hinaaro outou i te tahi mau vea o te A ara mai na! i mua nei, a ani atu i te mau Ite no Iehova o to outou vahi aore ra a papai i te hoê o te mau vahi nohoraa piri roa ˈˈe i te api 5.