Te hoê taparuraa no roto mai i te mafatu
TE VAI ra i roto i te A ara mai na! o te 8 no Me 1996, te hoê anairaa tumu parau no nia i te faaamuraa i te tamarii. Ua maere matou ma te oaoa i te mau pahonoraa a te feia taio, tei noaa mai ia matou na te ao atoa mai. O teie rata i muri nei iho â râ te mea putapû.
“E tia ia ˈu ia faaite atu e te rahiraa o matou o tei horoa i ta matou mau tamarii, ua hinaaro mau â matou e tapea mai ia ratou. E taurearea tamahine faaipoipo-ore-hia na hoi au, o te haere noa ra i te haapiiraa. I te iteraa to ˈu nau metua e ua hapû vau, ua faaara maira raua ia ˈu, e e tia ia ˈu ia feruri na mua i te maitai o te aiû i to ˈu iho nei, e ia horoa e faaamu ia ˈna. Ua parauhia mai ia ˈu e ‘e hinaaro te hoê aiû i te hoê mama e te hoê papa,’ o ta ˈu ïa e ore e nehenehe e horoa ˈtu. Aita to ˈu nau metua i hinaaro e ia tapea mai au i te aiû—e tiahi raua ia ˈu mai te peu e e aiû ta ˈu. Eaha ta ˈu e nehenehe e rave? Ua na ô mai raua e: ‘Eita oe e here i ta oe aiû, no to ˈna raveraa i to oe tiamâraa.’
“I te haamataraa to ˈu opu i te rahi, ua vaiihohia vau i te fare haapiiraa e ua afaihia vau i te hoê fetii ra e faaea ˈi. I to ˈu faarueraa i te fare, ua ite au e eita vau e fariihia i reira e tae noa ˈtu i te taime e fanau ai au, e e horoa ˈi au e faaamu i te aiû.
“Ua tonohia vau i te hoê fare no te mau metua vahine faaipoipo-ore-hia. I to te vahine turuutaa aniraa mai ia ˈu e ua papu anei ia ˈu i ta ˈu faaotiraa e horoa e faaamu i ta ˈu aiû, ua ite au e aita oia i taa e aita ta ˈu e ravea ê atu. UA HINAARO VAU E TAPEA MAI I TA ˈU AIÛ! Ua hinaaro noa na vau e ite ia ˈna ia ata e ia oaoa. E tia i ta outou mau taata taio ia ite e e rave rahi metua vahine fanau e manaˈo ra mai ia ˈu nei.
“Aita i horoahia mai i te tahi atu ravea. No reira, ua rave au mai tei parauhia mai ia ˈu no te ‘maitai’ o te tamarii. E ua ora vau ma te hoê pepe hohonu mai reira mai. Te peapea nei au e e manaˈo paha ta ˈu tamaroa e aita roa ˈtu vau i haapao ia ˈna e aita vau i hinaaro ia ˈna.
“I teie nei, ei Kerisetiano, te haafaahiahia noa nei au i te mau aˈoraa a te Bibilia no nia i te mau huru tupuraa fifi roa, na tatou iho hoi e imi nei, no te mea aita e faaohipahia ra te Parau a te Atua i roto i to tatou oraraa. Te faaite ra oia i te mau faahopearaa mauiui e rave rahi o te feruriraa a te ao nei. E tia râ i te feia i horoahia e faaamu, ia ite e noa ˈtu e ua horoahia ratou e faaamu, e ere ïa te auraa e aita ratou i hinaarohia. E e, a faaite atu na ia ratou!”