“Te maimiraa i te taata ohipa aravihi rahi roa ˈˈe”

Teie ïa te tumu parau o te A ara mai na! o te 8 no Novema 1995. Ua anaanatae te feia taio na te ao atoa nei i teie tumu parau.

Teie ta Amang no Douala, i Cameroun, i papai: “Ua anaanatae au i taua mau tumu parau ra no te mea mea au roa na ˈu te ohipa aravihi, te mau peni maitatai iho â râ. Te taa ra ia ˈu i teie nei e te vai ra te hoê Taata ohipa aravihi rahi aˈe ia Van Gogh, Rembrandt, De Vinci, e vetahi atu â—oia hoi te Atua ra o Iehova.”

I St. Barthélemy, i te mau Antilles Farani, teie ta Frederick i parau: “E maha taime to ˈu taioraa i te tumu parau, e i te taime taitahi ua î roa vau i te mauruuru no te mau mea haviti ta to tatou Poiete i horoa mai na tatou.”

Teie ta Assunta no Italia i papai: “Ua hinaaro roa vau e peni. Ua faarahi te reira i to ˈu anaanatae no te ao apî a te Atua.” E ua parau o Irena, no te Repupilita no Tekolovakia e: “Ia haere matou i te mau fare vairaa tauihaa tahito, e tia ia matou ia aufau no te mataitai i te mau ohipa aravihi, area te Poiete ra, ua pûpû mai oia na tatou i te mau mea natura haviti atoa ma te tamoni ore, i te mau mahana atoa.” Teie ta Aline no Beresilia i papai: “Noa ˈtu e te fanaˈo pinepine nei tatou i te mau tumu parau o te tauturu mai ia tatou ia haafaufaa i te huru o Iehova, ua haaputapû râ teie mau tumu parau i to ˈu mafatu. E rave rahi tuhaa iti no nia i te poieteraa tei horoahia mai o te faarahi ra i to tatou mauruuru no te here o Iehova.”

I te tau toetoe i Wisconsin, no te mau Hau Amui no Marite, teie ta Anne i papai: “Ua tauturu mau â te reira ia ˈu ia haafaahiahia i te haviti o te mau mea i poietehia. I te tahi mau taime i te tau toetoe, e mea fifi ia itea ˈtu te reira. I taua noa mahana ra i taio ai au i te tumu parau, ua haere au i rapae e ua ite au i te pape paari i nia i te hoê amaa, te hoê rauere tei î roa i te hiona, te mau taahiraa avae animala i roto i te hiona. Mauruuru faahou ia outou no te faahaamanaˈoraa mai e e nehenehe ta tatou e haafaahiahia i ‘te Taata ohipa aravihi rahi roa ˈˈe.’”

Mai te peu e e hinaaro outou ia noaa noa mai ia outou teie vea, a haere atu e farerei i te mau Ite no Iehova i to outou vahi faaearaa aore ra a papai i te vahi nohoraa piri roa ˈˈe i faataahia i te api 5.